DILI, 29 janieru 2024 (TATOLI)—Governu liuhosi Sekretáriu Estadu Ensinu Sekundáriu Jerál no Eskola Tékniku Vokasionál, Domingos Lopes Lemos, enkoraja timoroan ne’ebé ramata ona sira-nia estudu no iha vokasaun ne’e atu aplika ba bolsa rekrutamentu ba manorin.
Notísia Relevante: ME mantein desizaun hodi fó oportunidade ba kontratadu sira konkorre bolsa rekrutamentu
“Atu hateten hela ba maluk graduandu sira katak Ministériu Edukasaun loke ona vaga ba kandidatu profesór sira iha Timor-Leste, enkoraja ema hotu ne’ebé sente iha vokasaun atu aplika, liuliu antigu-voluntáriu kualifikadu sira no ema-ne’ebé graduadu ho diploma iha edukasaun,” Governante ne’e hateteten ba jornalista sira, hafoin partisipa iha serimónia gradusaun Eskola Tékniku Informátika (ETI) ba dala-IX, iha salaun IoB, Fomentu, segunda ne’e.
Nia husu aplikante atu aplika sira iha sistema online no iha mós sentru INFORDEPE (Institutu Nasionál Formasaun Dosente Profisionál Edukasaun) nakloke hodi simu aplikante no funsionamentu mós iha edukasaun munisipál sira.
Aplikante sira iha nasionál bele submete liuhosi online mak bolsa.cfp.gov.tl no liuhosi dokumentu iha servisu munisipál edukasaun ka INFORDEPE iha Dili ho ninia prazu ka durasaun tempu mak hahú hosi 29 janeiru-09 fevereiru 2024.
Rekezitu no dokumentu mak aplikante nasionalidade timoroan, kopia billete identidade, pasaporte ka kartaun eleitorál, baxarelatu ka D3, Lisensiatura ka D4, mestradu ka doutoramentu no kopia diploma legalizadu no mós foto koloridu 3X4.
Antes ne’e, Diretora Nasionál Rekursu Umanu, Anita Tavares de Jesus, hateten vaga ba bolsa rekrutamentu faze dahuluk ba manorin sira iha nivel ensinu pré-eskolár no báziku hamutuk 1.500.
Ministériu Edukasaun hatuur ona mekanizmu ba bolsa refere ne’ebé ezije teste dijitál, nune’e bele iha transparánsia no seriedade ba rekrutamentu kandidatu sira ho diploma ministeriál númeru 82/2023, 22 dezembru, ne’ebé ko’alia kona-ba regulamentu ba rekrutamentu karreira dosente.
Notísia Relevante: Vaga ba bolsa rekrutamentu ba profesór sira fó sai iha fevereiru
Jornalista : Osória Marques
Editór : Cancio Ximenes
