DILI, 29 janeiru 2024 (TATOLI)–Vítima inséndiu kuarentena Tasi-Tolu hamutuk xefe família 38 ne’ebé hela iha fatin provizóriu Lanud-Bairru Pite ne’e, iha xefe família 32 deside sai hosi fatin refere hodi hela hamutuk hó família no balun hela iha uma “kost”.
Notísia Relevante: Vítima inséndiu kuarentena Tasi-Tolu konkorda reintegra ba sira-nia munisípiu
Vítima inséndiu kuerentena Tasi-Tolu, Adriana de Carvalho, hateten agora daudaun ne’e iha xefe família balun mak deside hodi hela nafatin iha fatin provizóriu ne’e.
“Governu hosi Ministériu Administrasaun Estatál haruka ami tenke sai, entaun ami xefe família 32 deside voluntariamente sai hodi ba hela ho família no hela iha kost. Ami hela uma kain neen mak sei hela iha ne’e, tanba ami laiha osan ba hela iha kost no sente ladún di’ak ba hela ho família,” Vítima Kuerentena Tasi-Tolu, Adriana de Carvalho, hateten ba Agência Tasi-Tolu iha Bairru Pite, sesta (26 jameiru 2024) ne’e.
Tuir nia, sira bele hela hamutuk família iha Dili maibé foufoun de’it ne’e mak simu malu di’ak, tanba iha oan rua no familia sira mós iha oan entaun bele kria problema foun fali.
Governu promete katak iha semana rua nia laran ne’e vítima sira ne’e tenke sai hosi fatin provizóriu, tanba ne’e mak vítima sira hein sira-nia materiál konstrusaun no osan uitoan hodi bele konstrui uma iha ninia moris fatin iha Rejiaun Administrativu Espesiál Oé-Cusse Ambeno (RAEOA).
Nia hateten, nia iha membru família hamutuk na’in-lima (5) ho nia laen-kaben ne’ebé mak agora daudaun servisu hela iha kampañia privada ida iha kapitál Dili.
Governu haruka vítima sira-ne’e sai maibe iha tempu hanesan vítima sira mós hein hela material kontrusaun hosi IX Governu Kosntitsuionál hodi sira bele konstrui sira-nia uma.
Tuir planu, vítima Adriana de Carvalho sei ba hela iha Oé-Cusse no husik nia laen-kaben mak atu hela iha kost iha Dìli, nune’e nia bele buka servisu atu bele sustenta nesesidade familia uma laran.
Iha fatin hanesan, Rogerio dos Santos, hateten nia iha membru família hamutuk ema na’in-haat (4), ne’ebé tenke fila ba nia rai moris fatin iha Atabae-Bobonaro, tanba laiha fatin no rai atu halo uma iha Dili.
Solusaun di’ak-liu, nia dehan, nia parte sei lori nia família hirak ne’e ba hela iha Bobonaro, hafoin ne’e nia sei fila-fali mai Dili hodi buka servisu atu bele sustena família uma laran.
“Kondisun moris mak hanesan ne’e, tenke fila-fali ba rai moris fatin. Ha’u mak hela iha Dili hodi buka servisu,” nia dehan.
Notísia Relevante: Deskonfia sirkuitu elétriku, ahi-han kuarentena Tasi-Tolu
Jornalista : Jesuína Xavier
Editór : Cancio Ximenes
