Dosente 18 hosi universitáriu publiku-privadu konklui formasaun kona-ba edukasaun pás
DILI, 30 janeiru 2024 (TATOLI)–Dosente 18 hosi universitáriu públika no privadu iha Timor-Leste konklui formasaun kona-ba edukasaun ba pás durante semana neen (6) ne’ebé fasilita hosi Organizasaun naun Governamentál Internasionál Cultura Celestial, Páz Mundiál no Restauração da Luz ka HWPL (Peace educator training program) hosi Korea Súl,
Xefe Departamentu Relasaun Internasionál iha Universidad da Paz (UNPAZ), João Francisco Maia, hateten edukasaun pás transforma mentalidade joven sira-nian no kontribui ba armónia sosiál iha nasaun ida-ne’e.
“Edukasaun pás ne’e importante ba ita Timor-Leste tanba ita Timor ne’e konsidera hanesan post conflit ba mentalidade nian liuliu jerasaun foun sira. Tanba ne’e, presiza transformasaun mentalidade hodi oinsá promove kultura no pás, nune’e bele kontribui ba sustentabilidade no armonia,” Xefe Departamentu Relasaun Internasionál ne’e hateten ba jornalista sira hafoin partisipa iha enseramentu formasaun ba edukasaun pás no atribui sertifikadu iha MESSK Colmera, tersa ne’e.
Dosente akresenta tan formasaun ne’e importante tebes tanba úniku maneira ne’ebé transforma ema-nia mentalidade no atetude hadomi pás.
“Úniku maneira ne’ebé transforma ita-nia estudante nia mentalidade atetude kria pás maibé ida-ne’e só liuhosi edukasaun de’it. Neineik no beibeik, ita-nia joven sira iha ona konsiénsia ho hadomi pás. Hosi ne’e, ami-nia planu mak ida, implementa institusionál kurríkulu ba matéria iha Ensinu Superior, iha Universidade da Páz, ami integra ona matéria kursu obrigatóriu iha UNPAZ liuliu fakuldade siénsia umana. Ne’ebé, ami implementa iha tinan ida-ne’e ba estudante finalista no kursu ne’e obrigatóriu tenke foti antes remata,” nia hateten.
Kria pás mak tenke integra iha kurríkulu, nune’e bele implementa obrigatoriamente ba estudante sira.
Delegation Team Member & Lecturer of HWPL (Peace educator training program), Oliver Kim, hateten ema nain-18 hosi instituisaun sira-ne’ebé ohin gradua kona-ba edukasaun dame, sira-ne’e kompleta ona programa no sira bele sai edukadór dame HWPL no sira implementa edukasaun dame iha instituisaun ne’ebé sira hanorin bá.
Karaterístika pás ne’e presiza ba ema hotu atu halo koordenasaun iha sosiedade no oinsá atu hetan aromonia iha sosiedade umanu.
“Ha’u hanorin ita-nia estudante sira ka universitáriu sira, se sira hanorin karáter dame ne’e no sira neon liu duni, sira bele sai membru sosiedade nian. Ha’u haree katak, sira aprende karáter dame ne’e bele eskolla dalan ida-ne’ebé tuir sira-nia konsiénsia no laran,” nia hateten.
Kursu ne’e hala’o durante semana hitu (7) ne’ebé foti tema “Peace Educator Training Program” (HWPL)
Ministru Ensinu Superiór, Siénsia no Kultura (MESSK), José Honório, hateten partisipante sira iha formasaun refere mai hosi Instituisaun Ensinu Superiór Públiku no privadu sira mak hanesan Universidade Nasionál Timor-Leste (UNTL), Institutu Siénsia Católica CRISTAL (ISC), Universidade Dili (UNDIL) no Universidade da Pás (UNPAZ).
Jornalista : Osória Marques
Editór : Cancio Ximenes
