DILI, 30 janeiru 2024 (TATOLI)—Arsebispu Arkidioseze Metropolitana Dili, Don Virgílio Kardeal da Silva do Carmo, SDB, hateten padre Domingos da Costa Alves mak subtitui Saudozu Ildefonso Xavier hodi sai Koordenadór ba múzika iha Institutu Superiór Filozofia Teolojia (ISFIT) Dom Jaime Garcia Goulart Fatumeta.
Notísia Relevante: In memoriam: Maestro múzika litúrjika Pe. Ildefonso Xavier lakon vida
“Figura ne’ebé atu troka Padre Ildelfonso hanorin múzika ne’e lahetan. Maibé igreja sei buka tanba iha ne’ebá la’ós dioseze nian maibé konferénsia episkopál nian, entaun bispu sira sei haree fila-fali ema. Agora Koordenadór Múzika ISFIT Fatumeta ne’eba ne’e, padre Domingos da Costa Alves mak iha ne’ebá,” Don Virgílio Kardeál hateten ba jornalista sira hafoin fó pose ba direjente foun Universidade Católica de Timor-Leste (UCT) São João Paulo II, iha salaun UCT, Balide, tersa ne’e.
Igreja presiza buka ema ne’ebé ho nível di’ak hodi forma futuru múzika ba nasaun ida-ne’e.
“Ita sei buka ema hodi truka ba Padre Idelfonso nia fatin, hodi forma futuru múzika litúrjika iha ita-nia rain,” nia dehan.
Pe. Ildefonso Xavier hala’o tratamentu iha Hospital Nasional Guido Valadares (HNGV) durante semana tolu nia laran, kinta (25 jabeiru 2024) ne’e, nia hakotu iis iha tuku 7h45 dadeersan tanba moras komplikadu ho fuan.
Maestro múzika litúrjika ne’e moris iha Dug Hau, suku Luga-tu, postu administravu Ainaro, munisípiu Ainaro iha loron 17 fulan-maiu 1952. Nia moris hosi inan-aman Adelino dos Reis no Adelina Xavier.
Pe. Ildefonso Xavier hala’o nia estudu iha área múzika iha Portugál no nia misaun tinan barak iha Portugál. Nia fila mai Timor-Leste hanesan profesór língua portugeza iha Universidade Católica Timorense iha Balide. Maestro múzika litúrjika ne’e, nia jornada moris to’o iha optas nakaras ho idade 72.
Jornalista : Osória Marques
Editór : Cancio Ximenes
