DILI, 31 janeiru 2024 (TATOLI)—Governu liuhosi Ministériu Solidariedade Sosiál no Inkluzaun (MSSI) distribui ona foos saka 22.841 ba Sentru Solidariedade Sosiál no Inkluzaun Munisipál iha territóriu nasionál.
Notísia Relevante: Populasaun iha kapitál hakarak sosa foos ‘Golden Star’ maibé seidauk asesu
“Ita distribui ona foos tonelada 707.2 ba armazen Sentru Solidariedade Sosiál no Inkluzaun Munisipál, hodi atende nesesidade família vulnerável no família ne’ebé afetadu hosi dezastre natural,” Diretór Dirssaun Nasionál Asisténsia Sosiál (DNAS), Fernando dos Reis, hateten ba Agência Tatoli liuhosi telefónika, kaurta ne’e.
Diretór ne’e hateten, daudaun ne’e DNAS prepara hela atu distribui tan foos saka 2.041 ba armazen Sentru Solidariedade Sosiál no Inkluzaun iha munisípiu Viqueque no saka 2.400 ba armazen Sentru Solidariedade Sosiál no Inkluzaun Covalima ho totál saka 4.441 no Ataúro iha saka 800.
“Ita distribui hotu ona foos ba munisípiu sira no hela mak Viqueque, Covalima no Ataúro. Maibé aban Covalima aranka entaun ita hela mak Viqueque no Ataúro,” nia dehan.
Nia hateten, iha foos saka hamutuk 5.445 mak sei rai hela iha Ministériu Solidariedade Sosiál no Inkluzaun (MSSI) nia armazen.
Jornalista : Osória Marques
Editór : Cancio Ximenes