Diretór EBC Esperança da Patria rekomenda ME aumenta profesór
DILI, 01 fevereiru 2024 (TATOLI)—Diretór Ensinu Báziku Sentrál (EBC) Esperança da Pátria, Hernanio de Carvalho, hateten EBC ho nia filial lima hanesan filiál ensinu báziku Becuse de Baixo, Bemori, Culuhun, Camea Sentru no Camea Raihun menus profesór no sala-de-aula.
“Hosi filiál lima ne’e, EBC, Culuhun no Becuse de Baixo mak problema tanba profesór menus. Ho ida-ne’e ami rekomenda ba ME mak aumenta tan sala-de-aula, profesór hosi sentru to’o filiál sira hotu. Ami-nia proposta ne’ebé ami submete ona ba ME liuhosi Edukasaun Munisipál Dili. Ami presiza tan profesór na’in 57,” Nia hateten ba jornalista sira hafoin hala’o enkontru ho Sekretáriu Estadu Ensinu Sekundáriu Jerál no Ensinu Tékniku Vokasionál iha salaun EBC Becora, kinta ne’e.
Daudaun ne’e totál alunu 5.751 ne’ebé kompostu hosi feto 2.815 no mane 2.936. Totál estudante iha eskola Esperança da Patría sentru ne’e hamutuk 1.482, mane 718 ho feto 764; EBF Camea Centro hamutuk 1.428, mane 724 ho feto 704; EBF Camea Raihun hamutuk 458, mane 241 ho feto 217; EBF Becuse de Baixo hamutuk 838, mane 446 ho feto 384; EBF Doque de Caxias Bemori hamutuk 734, mane 388 ho feto 346 no EBF Culuhun hamutuk 819, mane 419 ho feto 400.
Profesór sira-ne’ebé hanorin iha eskola refere ne’e hamutuk 174 ne’ebé kompostu hosi profesór permanente 125 no voluntáriu 49. Iha EBC sentru ne’e hamutuk 49, peramanente 40 no voluntáriu sia (9); EBC Camea Centro na’in-sia (9), permanente 22 no voluntáriu na’in-hitu (7); EBC Camea Raihun professor 13, permanete 10 ho voliuntáriu na’in-tolu (3); EBC Becuse Kraik hamutuk 19, permanente 7 no voluntáriu 12; EBC Doque de Caxias Bemori hamutuk 29, permanente 26 no voluntáriu 3 no EBC Culuhun 35, permanente 20 ho voluntáriu 15.
Sala-de-aula Ensinu Báziku Sentrál (EBC) Esperança da Pátria ho nia filiál hamutuk 119 ne’ebé kompostu hosi EBC 30, EBC Camea Centro 20, EBC Camea Raihun 12, EBC Becuse Kraik 18, EBC Doque de Caxias Bemori 22 no EBC Culuhun 17.
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten ho preokupasaun sira-ne’e inklui EBC ho filiál lima ne’e Ministériu Edukasaun sei rezolve ho vagatura daudaun ne’e.
“Tanba ne’e mak Ministériu Edukasaun atu rezolve situasaun ne’e ho di’ak mak loke vaga ba kandidatu profesór atu responde ba kestaun sira-ne’e. Tuir kuadru pessoal ne’ebé ekipa halo observasaun no fiskalizasaun no oinsá prense iha eskola hanesan Diretór Esperansa da Pátria hato’o ona mai. Ita haruka sira mai prienxe aula,” nia dehan.
Mezmu mesmu eskola ida iha nia filiál barak maibé tenke iha jestaun ne’ebé di’ak, ne’e sei la mosu problema ida hanesan agora akontese ne’e. Ho kestaun hato’o ona ba diretór eskola ne’e atu re-distribuisaun profesór eskola ne’ebé mak presiza.
Rezultadu hosi observasaun kuadru pesoál iha territóriu nasionál, Sekretáriu Estadu dehan profesór ba nível ensinu báziku presiza 885.
Ba profesór ne’ebé moras no mate ne’e informasaun seidauk to’o iha ne’ebá, seidauk to’o nasionál, no atu nasionál hatene informasaun ne’e, edukasaun munisipál tenke kanaliza mai tanba estudante iha Dili barak maibé presiza halo jestaun di’ak mak prosesu hotu la’o di’ak.
“Ami seidauk simu informasaun, ami foin mai mak ita-boot sira hato’o. Maibé ita hamutuk hosi ministru to’o mai profesór mak bele rezolve. Labele dehan problema iha territóriu nasionál ne’e nia kauza hosi profesór 1.400, lae. Tinan 2022 mai kraik ita laiha problema tanba ita seidauk iha profesór kontratadu. Karik iha difikuldade utioan hanesan ohin adjuntu ho koordenadór esplika ona,” nia dehan.
Maibé, nia dehan, ME esforsu nafatin hodi oinsá bele prienxe kargu oráriu semana ida hanorin oras 24, no meiu jere atu prosesu aprendizajen ne’e tenke la’o.
Atu dehan de’it katak sira falla kestaun administrasaun nian tanba tuir dadus inspesaun foti ne’e falla jestaun kada eskola nian.
Jornalista : Osória Marques
Editór : Cancio Ximenes
