DILI, 01 fevereiru 2024 (TATOLI)—Diretór Edukasaun Munisípiu Dili, Carlito da Silva, hateten xefe família hamutuk 81 mak to’o agora sei nafatin hela metin iha iha arredór eskola iha munisípiu Dili.
Notísia Relevante: Autoridade Dili Sei Muda Komunidade Hela iha Arredores Eskola
“Xefe família ne’ebé hela iha arredór eskola ne’e hamutuk 81 no família haat (4) ne’ebé daudaun ne’e hela iha arredór edukasaun munisipál nian, ne’ebé hamutuk 85 no kona-ba família sira-ne’e. Ha’u koordena ona ho xefe suku, sosiedade sivíl ho parte partidu polítika nian, ami halo enkontru iha munisípiu Dili nian no konkorda ho unanimidade ho 100% no ami haruka ba ministériu, la aprova nune’e kala la hasai,” nia hateten ba Agência Tatoli liuhosi telefónika, kinta ne’e.
Tuir informasaun ne’ebé iha katak polítika toponímia nian atu hasai ema hirak ne’e maibé laiha indeminizasaun ba família ka okupante arredór eskola.
“Ida-ne’e, ita hotu hein de’it desizaun hosi Governu ba okupante sira. Tanba, ita haree sira nafatin iha resintu eskola nian, maibé polítika Governu liuhosi Toponímia sei ba haree komunidade ne’ebé hela iha resintu eskola,” nia dehan.
Eskola hirak ne’ebé okupante sira okupa ne’e mak Eskola Ensinu Sekundáriu Jerál (ESJ) 10 Dezembru Comoro, Eskola Ensinu Sekundáriu Jerál (ESJ) 4 Setembru UNAMET Balide no Eskola Ensinu Báziku Sentrál (EBC, sigla protugés) Bidau Akadiru-hun mak okupante barak-liu.
Eskola seluk, nia dehan, iha okupante maibé iha de’it ema id aka rua hanesan ne’e, no okupante hirak ne’e maiória komunidade baibain buka moris iha Dili maibé iha ema ida-rua mak funsionáriu públiku no balun profesór ne’ebé hanorin iha eskola ne’ebé sira hela bá.
“Sira-ne’e ami aproxima ona no momentu ami halo enkontru iha eskola Doque de Caxias Bemori hodi ko’alia kona-ba osan maibé laiha rezultadu ne’ebé ita akompaña de’it polítika Governu ne’e nian hodi hasai okupante sira,” nia dehan.
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten atu liberta okupante iha arredór eskola ne’e presiza polítika ida no kria kondisaun.
“Ami haree ona ida-ne’e iha eskola no ami sei koordena ho parte Terras Propriedade ho seguransa sira atu haree ida-ne’e. Tanba, ita labele ba obriga ka duni sira sai de’it. Maibé ita-nia parte mós presiza kria kondisaun ba sira. Entaun ha’u labele ko’alia uluk ida-ne’e. Atu bainhira mak liberta ne’e, ha’u seidauk bele ko’alia,” nia hateten.
Kona-ba uma ba profesór ne’ebé iha resintu eskola, nia hateten, ida-ne’e seidauk bele ko’alia tanba problema boot ne’ebé enfrenta mak sala-de-aula la to’o, tanba ne’e hanoin didi’ak mak halo espansaun ba ida-ne’e.
“Neineik ita sei to’o ne’ebá, tanba tinan lima sei naruk,” nia hateten.
Jornalista : Osória Marques
Editór : Cancio Ximeens
