iklan

MUNISÍPIU, SAÚDE

Governu orienta realoka profisionál saúde 50 iha Ermera hala’o fali serbisu

Governu orienta realoka profisionál saúde 50 iha Ermera hala’o fali serbisu

Logo ministeriu saude

DILI, 06 fevereiru 2024 (TATOLI)–Diretór Servisu Saúde Ermera (SSE), António de Deus Fátima, hateten nia hetan orientasaun hosi Governu liuliu Vise Ministru Saúde atu realoka profisionál saúde hamutuk 50 ne’ebé kontratu termina iha 31 dezembru 2023, ba sentru saúde sira hodi hala’o fali sira-nia kna’ar hanesan baibain.

Governu hato’o ona karta ida katak ba fasilidade sira-ne’ebe mak iha funsionáriu permanente iha bele kontinua serbisu, no postu saúde sir- ne’ebé mamuk ne’e tenke realoka profisionál saúde sira-ne’ebé ho rejime internatu hodi bele hala’o serbisu.

“Sira-ne’ebé mamuk ema permanente laiha, ita nafatin tau sira iha ne’eba. Ita koloka na’in 50 ba iha postu saúde liuliu fatin sira-ne’ebé mak mamuk. Ita mós fó ona orientasaun ba xefe sentru saúde sira atu realoka fali ba sira-nia fatin,” Diretór António de Deus Fátima hateten ba Tatoli liuhosi telefónika, tersa ne’e.

Diretór esplika realokasaun ne’e bazea ba orientasaun hosi vise ministru saúde no profisionál saúde sira hahú ona serbisu iha 28 janeiru liuba ne’e.

Tuir nia, total profisionál saude sira-ne’bé termina kontratu iha internatu ne’e kuaze na’in-80 maibé na’in-30 la tama, tanba dúvida hela ho kontratu ramata no tama serbisu mós Governu la fó ssaláriu.

Ministériu Saúde garante saláriu ba profisionaá saúde sira koloka iha postu no sentru saúde iha fulan tolu oin ba leten.

Xefe Sentru Saúde Hatulia, Cristiano Maia, hateten sira hetan duni orientasaun hosi Servisu Saúde Munisipal Ermera hodi realoka profisionál saúde ho rejime internatu ne’ebé kontratu ramata iha dezembru (2023) nia rohan.

Nia dehan, iha profisionál saúde ema na’in-tolu mak sira realoka ba iha postu saúde sira iha Hatulia, munisípiu Ermera.

“Iha postu rua mak ami tau ona pesoal rua, postu saude Leimia Kraik ne’e tau enfermeiru ida no pesoál saíde públika ida no Manuemta iha enfermeiru ida,” nia hateten ba Agência Tatoli liuhosi telefónika.

SSE menus aimoruk

Entretantu, Diretór Servisu Saúde Ermera (SSE), António de Deus Fátima, hateten SSE menus aimoru vital no konsumivel, tanba iha fulan kotuk iha stock out 16 ne’e agora menus.

“Aimoruk Amoxilin, Paracetamol ne’ebé menus, entaun normalmente ita fó loron haat ka lima ba pasiente sira maibé agora ita fó loron rua de’it. Aimoruk konsumivel sira hanesan soru, masker, daun tau soru no seringa sira-ne’e mak menus,” nai dehan.

Nia garante, SSE aprezenta kedas ona pedidu no iha pedidu regular ne’ebé submete ba maibé kuantidade mak menus.

Entretantu, iha SSE ekipamentu ba ezame pasiente sira sufisiente attu profisionál saúde sira bele utiliza.

“Ekipamentus baziku sira-ne’ebé ita-nia médiku sira uza ba atendimentu pasiente sira sufisiente, tanba ita hetan apoiu hosi Governu Japaun hanesan X-Ray no laboratóriu,” nia dehabn.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!