iklan

DILI

ANAAA fó sai ona rezultadu akreditasaun provizóriu 2023

ANAAA fó sai ona rezultadu akreditasaun provizóriu 2023

Diretór-Ezekutivu Ajénsia Nasionál Avaliasaun no Akreditasaun Akadémika (ANAAA,) Nilton Diamantino Paiva. Imajen/Espesiál.

DILI, 09 fevereiru 2024 (TATOLI)–Ajénsia Nasionál Avaliasaun Akreditasaun no Akadémika, Institutu Públiku (ANAAA, I.P), fó sai ona rezultadu akreditasaun provizóriu hosi avaliasaun ba kursu 30 iha instituisaun seuperiór ida ba tinan 2023.

Notísia Relevante: Instituisaun superiór neen no kursu 32 sei hetan avaliasaun iha tinan ne’e

“Ko’alia kona-ba akreditasaun avaliasaun, ohin ita anúnsia ona rezultadu avaliasaun ba estudu 30 no Instituisaun ida Pusat Budaya Indonésia. Akreditasaun no avaliasaun halo ba tinan kotuk nian ne’e, ANAAA envolve mós avaliadór nasionál no Internasionál no mós halo kooperasaun di’ak ho reitór hosi ensinu superiór hodi anúnsia nia rezultadu,” Diretór Ezekutivu ANAAA, Nilton Paiva, hateten ba Agência Tatoli, hafoin partisipa semináriu abertura formasaun lian Portugés ba profesór dosente sira hosi Ensinu Superiór no entrega seritikadu ba formandu hosi 2023 nian, iha Auditório Muzeu Reziténsia Timorense (AMRT), Caicoli, sesta ne’e.

Iha jullu to’o outubru tinan 2023, ANAAA hala’o avaliasaun ba akreditasaun Institutu Boaventura Timor Leste (IBTL) no avaliasaun ba programa estudu 30 hosi instituisaun sira hanesan Dili Institute of Technology (DIT) ho programa estudu tolu (3), Institute of Business (IOB) ho programa estudu haat (4) no Instituto Superior Cristal (ISC) ho programa estudu neen (6).

Nune’e mós, ANAAA halo avaliasaun ba akredistasaun Universidade da Paz (UNPAZ) ho programa estudu neen (6), Universidade de Dili (UNDIL) ho Jestaun no kontabilidade ba grau baxarelatu no lisensiatura tolu (3), Universidade Oriental Timor Leste (UNITAL) ho programa estudu tolu (3), East Timor Coffee Institute (ETCI) ho programa estudu haat (4) no Institutu Católica para Formação de Professores (ICFP) ho programa estudu Fomasaun ba Profesór ho grau baxarelatu ida (1).

Hosi rezultadu provisóriu ne’e, sei fó biban ba instituisaun ensinu superiór sira atu halo rekursu durante semana rua hosi loron distribuisaun antes públika rezultadu finál liuhosi públikasaun diploma ministeriál.

Sekretáriu Estadu Asuntu Ensinu Superiór Siénsia no Kultura (MESSK), José Honório Jerónimo, hateten, iha tinan ne’e ANAAA halo avaliasaun no akreditasaun ba kursu 30 no mós ba IBTL.

“Ita bele halo konfirmasaun ho ANAAA tanba ohin ita fahe ona seritikadu avaliasaun nian ba sira,” nia dehan.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!