iklan

NASIONÁL, SAÚDE

MS rejista kazu Violénsia Bazea ba Jéneru 1.005 iha 2023

MS rejista kazu Violénsia Bazea ba Jéneru 1.005 iha 2023

Profisionál saúde sira tuir formasaun kona-ba sistema baze dadus ba violénsia bazea ba jéneru. Imajen Tatoli/Jesuína Xavier.

DILI, 12 fevereiru 2024 (TATOLI)–Governu liuhosi Ministériu Saúde (MS) no Fundu Nasaun Unida ba Popualsaun (UNFPA) fó formasaun ba profisionál saúde sira kona-ba baze dadus ba violénsia bazea ba jéneru (VBJ) iha ospitál no sentru saúde sira.

Diretór Nasionál Kuidadu Saúde na Familia iha Ministériu Saúde, Noel Gama Soares, hateten iha tinan 2023 ne’e Ministériu Saúde rejista kazu violénsia bazea ba jéneru (VBJ) hamutuk 1.005. (rihun ida lima)

“Ida-ne’e, konsidera sai númeru signifikante tebes. Múnisípiu sira-ne’ebé hetan violénsia bazea ba jéneru mak munisípiu Dili, Oé-Cusse (RAEOA) no Ermera aleinde munisípiu sira seluk,”  Diretór Nasionál ne’e hateten iha nia intervensaun iha abertura formasaun kona-ba sistema baze de dadus ba pesoál saúde sira iha Dili, iha Fatuhada, segunda ne’e.

Nia hateten, parseiru dezenvolvimentu hanesan UNFPA servisu hamutuk ho Ministériu Saúde harii ona uma mahon munisipiu, tanba vítima sira mai aprezenta sinál sira hanesan VJB barak mai iha ospitál no sentru saúde sira.

“MS ho UNFPA harii ona uma mahon iha munisípiu sira oinsá atu bele asegura vítima sira. Ida-ne’e krusiál tebes, tanba ema barak hetan violénsia maibé la brani fó saí ba li’ur ka ba ema seluk. Entaun, Ministériu Saúde (MS) kria estratéjia oioin atu hadi’a di’ak liután infraestrutura saúde nian,” nia dehan.

Importante liu tenke feto sira-ne’ebé mai iha ospitál no sentru saúde sira, atu hatene istória klinika, sosiál no família ne’ebé nia hetan atu sai indikadór ba sistema informasaun violénsia bazea ba jéneru (VBJ).

Ida-ne’e oinsá atu hatene hún lolos, indikadór VBJ mai hosi ne’ebé, tanba kalker instituisaun tenke iha dadus ida-ne’ebé di’ak atu ba futuru instituisaun ka kada ministériu bele foti asaun bazea ba informasaun sira hosi problema kliniku no sosiál.

Entretantu, Reprezentante UNFPA ba Programa Kombate Violénsia Bazea ba Jéneru iha UNFPA, Dircio Francisco Xavier hateten asaun formasaun ne’e importante atu responde ba kombate violénsia bazea ba jéneru, tanba bele ajuda profisionál saúde sira iha koñesimentu kona-ba asuntu VBJ.

“Objetivu hosi formasaun ne’e atu reforsa Ministériu Saúde iha setor saúde, hodi responde kazu violénsia bazea ba jéneru, liuhosi kapasitasaun pesoál saúde sira no estabelesimentu infraestrutura nesesáriu atu responde kazu violénsia bazea ba jéneru,” Dircio Francisco Xavier hateten iha nia intervensaun iha abertura formasaun kona-ba Sistema baze de dadus ba pesoál saúde iha Dili, iha Fatuhada, segunda ne’e..

Formasaun ne’e mós sei kontinua ba profisional saúde sira iha munisipiu kona-ba rekolla dadus ba iha sistema saúde hosi kazu violénsia bazea ba jéneru (VBJ).

“Ohin asaun importante ida tan, ita konsege integra sistema kolesaun de dadus ba sistema saúde no kontinua reforsa setór saude atu responde VBJ. Formasaun ida-ne’e atu profisional saúde iha kapasidade atu hatene kazu violénsia bazea ba jéneru ninian, hafoin ida-ne’e ita bele konsege jere espasu seguru ba vítima VBJ hanesan iha Liquiça, Ermera no Viqueque,” nia dehan,

SSIVC rejista VBJ hamutuk 315

Entretantu, Xefe Sentru Saúde Internamentu Vera Cruz (SSIVC), Maria Ferreira da Conceição, hateten iha tinan 2023 ne’e sentru saúde konsege rejista kazu violénsia bazea ba jéneru hamutuk 315 iha tinan 2023.

“Ita nia pesoál saúde sira-ne’ebé treinadu ona, sira rekolla ona dadus violensia bazeia ba jéneru hamutuk 315 iha 2023. Tipu kazu sira rejistu makaas mak violensia fízika no sexual”, nia refere.

Nia hateten, sentru saúde mós kontinua rejista kazu hanesan iha janeiru 2024 ne’e hamutuk 28 iha SSIVC no hosi númeru kazu violénsia seksual hamutuk tolu (3).

Xefe SSIVC esplika, tipu violénsia ne’ebé vítima hasoru hamutuk haat mak hanesan violénsia psikolójiku, fíziku, seksuál no ekonómiku.

Jornalista : Jesuína Xavier

Editora      : Cancio Ximenes

iklan
iklan

Leave a Reply

iklan
error: Content is protected !!