iklan

NASIONÁL, SAÚDE

AEAL-TL rejista ema ho moras Lepra iha Dili hamutuk 56

AEAL-TL rejista ema ho moras Lepra iha Dili hamutuk 56

Moras Lepra. imajen Google

DILI, 16 fevereiru 2024 (TATOLI)–Asosiasaun Ema Afeita Lepra iha Timor Leste (AEAL-TL) rejista ema afetada ho lepra iha munisípiu Dili hamutuk 56 hosi 2022 to’o 2023.

Hosi totál ne’e kompostu hosi mane hamutuk 36 no feto hamutuk ema na’in-20 inklui ida hosi Maubisse no ida hosi Aileu, no iha mós pasiente hosi Manatuto no Liquiça ne’ebé asosiasaun rejista hodi halo tratamentu iha Dili.

“Dadus sira-ne’e hosi munisípiu Dili de’it, tamba area AEAL-TL nian foin kobre area Dili de’it. Númeru pasiente sira-ne’e ema hamutuk 56,” Diretór Ezektuviu AEAL-TL, Joel Costa dos Santos, hateten ba Agência Tatoli liuhosi telefónika, sesta ne’e.

Númeru sira-n’e iha pasiente ida hosi munisípiu Ainaro ne’ebé refere ba Ospital Referál Maubise hodi halo tratamentu no rua hosi munisipiu Liquiça ne’ebé halo hela tratamentu iha Dili

Diretór ne’e, nia hateten, ema moras lepra ne’ebé husik tratamentu iha 2023 ne’e hamutuk ema 17 kompostu hosi mane 11 no feto neen (6).

Iha 2023. ema 20 mak konklui tratamentu ba sira-nia moras Lepra ne’ebé konpostu hosi mane 14 no feto ema na’in-neen (6).

AEAL-TL hanesan asosiasaun voluntária ne’ebé harii iha 2022 konstitui hosi ema na’in-12 ne’ebé agora dadauk ajuda maluk ema moras lepra hodi halo akonsellamentu ba ema moras lepra, vizita ema ho defisiensia lepra ne’ebé halo ona tratamentu no iha faze tratamentu.

Reprezentante pasiente Lepra ne’ebé nia moras kura ona, Ananias de Araújo hosi Maubisse munisípiu Ainaro, hetan mós moras lepra iha 2015 ho sinal lepra iha inisiu halo kedas tratamentu ne’ebé agora halo hela servisu voluntáriu hodi ajuda fali nia maluk sira defisiénsia lepra no moras lepra.

“Ami hamutuk ho kolega sira seluk ba vizita fali maluk ho moras lepra hodi bele halo tratamentu iha ospitál,” nia hateten ba Tatoli iha Bemori.

Nia hateten, iha esperiénsia vizita ema moras lepra ho estadu grave, halo ema hotu tauk, tanba iha transmisaun no iha aprezentasaun fízika ladi’ak.

Jornalista : Jesuína Xavier

Editor       : Cancio Ximenes

iklan
iklan

Leave a Reply

iklan
error: Content is protected !!