DILI, 19 fevereiru 2024 (TATOLI)—Diretór Operasaun Manutensaun Bee Timor-Leste, Empreza Públiku (BTL, E.P), Aleixo Santos, hateten BTL, E.P halo ona intervensaun ba sistema kanalizasaun tolu iha Dili, ne’ebé mak bee-mota ka inundasaun estraga iha sesta semana (16 fevereiru 2024) kotuk.
Notísia Relevante: Diretór BTL, E.P husu populasaun poupa no jere utilizasaun bee
“Iha udan sesta semana kotuk liubá hodi hamosu inundasaun no afeta ba ita-nia sistema kanalizasaun tolu iha Bidau. Iha ne’ebá ne’e, afeta hosi mota boot tun entaun afeta ba moru maibé la afeta ba sistema. Tanba bee tama tiha ba bomba sira-ne’e, maibé la konsege hasai bee ne’e to’o oras 10 nia-laran no ita rezolve kedas iha tempu ne’ebá. Komunidade husu no eijze atu loke eletresidade hodi sira fase tahu no foer sira-ne’ebé mak mota lori tun ne’e,” Diretór ne’ e hateten ba Agência Tatoli, hafoin ba partisipa lansamentu projetu apoiu emerjénsia ba labarik no hatán ba COVID-19 iha TL, iha kampaun UN, Caicoli, segunda ne’e.
Nia hateten, pontu rua (2) seluk iha zona neen (6) no sia (9), Benamauk, ida-ne’e iha sesta no sábadu ne’e ekipa halo identifikasaun ona, no ekipa presiza materiál hodi bele haloos tiha kanalizasaun hodi komunidade bele asesu fali bee-moos.
“Ita presiza materiál. Ohin mós ita-nia ekipa hamutuk 11 ne’ebé sei reprezentativa para kolabora, nune’e bele finaliza hodi bee bele tama fali ba ita-nai tratamentu,” nia dehan.
Diretór ne’e hatetetn katak pontu tolu mak iha zona 11, iha Maufelo ne’e impaktu boot hosi mota ne’ebé mak tama tanba kanu ne’e liuhosi mota no silu tiha kanu depois kanu nia junta (sambungan) mak tohar.
“Mota no inundasaun iha Dili laran ita rezolve hotu kedas. Agora kona-ba munisípiu sira ita seidauk iha informasaun,” nia dehan.
Nia subliña, iha zona ba sistema kanalizasaun nian iha Dili, BTL, E.P koloka ema na’in-hitu (7) ka ualu (8) hodi kontrola kanalizasaun sira.
“Ekipa ne’e halo identifikasaun ba kanu kuak, estraga no karik iha komunidade balun ne’ebé liga bee illegal. Tanba ne’e mak ita tau ema iha zona sira inklui tau iha kada munisípiu sira, nune’e bele halo manutensaun no kontrola ita-nia kanalizasaun no sistema distribuisaun,” nia dehan.
Jornalista : Osória Marques
Editór : Cancio Ximenes
