PAM husu dirijente DSMA dezenvolve setór agrikultura iha Bobonaro

BOBONARO, 21 fevereiru 2024 (TATOLI) – Prezidente Autoridade Munisipál (PAM) Bobonaro, Ernesto de Oliviera Barreto, husu ba Dirijente Servisu Munisipál Agrilultura (DSMA) atu foka servisu bá setór agrikultura nian hodi hadi’ak agrikultór nia moris.

Nia hato’o kestaun ne’e iha serimónia Hand Over servisu Diretór Sesante Diresaun Servisu Munisipál Agrikultura no Diresaun Servisu Munisipál Seguransa Alimentár Munisípiu Bobonaro, iha Tunubibi, kuarta ne’e.

Nia dehan, posiblidade iha mandatu IX Governu, Ministériu Agrikultura, Pekuária, Peska no Floresta sei konstrui Banku de Água ida iha munisípiu Bobonaro atu fornese bee natar hodi bele garante katak agrikultór sira halo produsaun batar no hare tinan ida dala-rua.

Notísia relevante: Natar ektare rihun 13-resin iha Maliana abandona

Nia parte sei la dúvida ba dirijente foun tanba mesak esperiénsia no servisu kleur ona iha Ministériu Agrikultura.

“Tinan ida-ne’e ou tinan oin sira halo Banku de Água, tanba iha enkontru nível nasionál, ha’u sempre ko’alia kona-bá destinu agrikultura Bobonaro, rai barak abandonadu tanba bee lato’o, ita halo irrigasaun, maibé volume bee lato’o, ne’e hanesan de’it, entaun ita halo Banku de Água, nune’e lahan tidur ne’e laiha ona, ema lakohi funsionáriu ona, tanba nia iha rai ektare rua de’it, nia bele moris di’akliu funsionariu,” nia hateten.

Maskieiha tempu badak ema seluk sei subtitui hanesan servidór estádu nia sei koopera ho diretór foun no Prezidente Autoridade Munisipál Bobonaro foun atu buka solusaun hodi rezolve estatutu ajente administrasaun no funsionáriu kazuál iha servisu Munisipál Agrikultura ne’ebé servisu durante tinan barak ona.

Nia husu ba funsionáriu agrikultura tomak atu servisu ho pontualidade no serbí ba agrikultór sira ho reponsabilidade atubele dezenvolve setór agrikultura iha munisípiu Bobonaro.

Diretór Sesante Servisu Munisipál Agrikultura Bobonaro, Alberto Gomes Lopes, hateten durante mandatu sei la halo buat barak ba agrikulór sira iha munisípiu Bobonaro, kumpre de’it orientasaun hosi superiór sira iha munisípiu no nasionál.

“Ha’u rekoñesu katak ha’u la halo buat foun iha ha’u-nia mandatu, hau la halo buat barak no ha’u la halo buat loos hotu, karik iha momentu ne’e ha’u halo falla ruma ne’e ha’u-nia sala,” nia deklara.

Diretór Servisu Munisipál Agrikultura Bobonaro foun, Longunihos João, husu diretór sesante atubele koopera hodi serbí agrikultór.

“Maski iha buat balu la’o tuir dalan, buat balu koloka ona iha fatin, balu karik seidauk, mai ita hotu hamutuk oinsá ita atu hadi’a iha futuru, tanba servisu ida ne’e la’ós foun ba ha’u. Ida-ne’e iha ami-nia área kedas, kuartu mak ketak ketak, buat hotu ne’ebé mak sesante halo, ha’u sei toma responsablidade,” nia katak.

Notísia relevante: Agrikultura Bobonaro prepara distribui ai-moruk kombate peste Karakól

Jornalista: Sergio da Cruz

Editór:Evaristo Soares Martins