Top

Komandu PNTL husu membru respeita povu

Komandante Jerál PNTL, Komisáriu Henrique da Costa. Imajen/ Tatoli

DILI, 23 fevereiru 2024 (TATOLI)-Komandante Jerál Polísia Nasionál Timor-Leste (PNTL), Komisáriu Polísia, Henrique da Costa, husu ba membru PNTL bainhira halo servisu tenke respeita povu liuhusi kontrola linguajen hodi nune’e povu nia konfiansa ba polísia kontinua labele mihis.

“Ha’u husu ba membru PNNTL sira hotu atu oferese servisu ne’ebé kualidade liuhusi ita-nia mentalidade atendimentu ba públiku liuhusi ita-nia intervensaun sira, kuandu membru ida atu halo atuasaun ruma iha terrenu tenke bazea ba iha standard (padraun) Operasionál ne’ebé PNTL iha ona,” Henrique da Costa hateten ba jornalista sira iha Komandu Jerál PNTL, Caicoli, sesta ne’e.

Nia dehan, membru PNTL ida tenke hatudu disiplina bainhira halo servisu nune’e bele fó satisfasaun ba povu.

“Dala barak ema sempre dehan polísia halo atuasaun ladún di’ak iha terrenu tanba ne’e ha’u husu membru atu hatudu disiplina bainhira halo serbisu liuliu bainhira halo atuasaun karik tenke halo tuir regulamentu polisiál ne’ebé iha ona,” nia afirma.

Henrique hateten, Prezidente Repúblika mós husu ba PNTL atu hadi’a mekanizmu atuasaun sira hasoru povu liuliu bainhira iha situasaun baibain PNTL tenke uza maneira aproximasaun ne’ebé di’ak atu labele uza forsa ne’ebé iha atu povu kontinua depozita konfiansa ba polísia.

“Polísia hadi’a liután nia dezempeñu servisu liuliu polísia tenke halo servisu besik hamutuk ho povu, polísia tenke hakbesik liu bá iha komunidade, depois atendimentu polísia ba iha komunidade tenke ho profisionál, kuidadu ita-nia linguajen, polísia nafatin respeita ita nia komunidade sira,” nia haktuir PR nia liafuan.

“Buat ne’ebé komandu orienta ba sira atu halo di’ak liután maka vizita ba iha ita-nia komunidade, vizita ba eskola no universidade sira hodi sensibiliza kona-ba lei hirak ne’ebé mak iha, hodi kontribui ba prevensaun krime no prevensaun asidente tráfegu no kódigu estrada nian”, nia dehan.

Komandante jerál ne’e husu ba membru polísia halo servisu disiplina no mantein servisu tuir orientasaun ne’ebé komandu fó, respeita kadeia komandu atu nune’e buat ruma pasa liuhusi sira-nia komandante, hafoin komandante kontinua ba komandu jerál atu nune’e bele responde ka fó solusaun ba difikuldade no situasaun sira enfrenta.

“Komandu nafatin husu ba membru PNTL iha territóriu nasionál tuun ba iha terenu atu identifika nafatin autór hirak ne’ebé sempre kria problema iha bairru-bairru sira, pois polisia bele foti medida identifikasaun ruma,” nia konklui.

Jornalista: Natalino Costa

Editór: Rafael Ximenes de A. Belo

Publisidade

Leave a Reply

Latest Post

error: Content is protected !!