iklan

EDUKASAUN, BOBONARO, HEADLINE, MUNISÍPIU

Xefe suku Odomau husu ME rezolve eskola EBF Anahun

Xefe suku Odomau husu ME rezolve eskola EBF Anahun

Kondisaun atuál infraestrutura iha Ensinu Báziku Filiál (EBF) Primeiru no segundu siklu 30 de agosto Anahun, suku Odomau, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 26 fevereiru 2024 (TATOLI)-Xefe suku Odomau, postu administrativu Maliana, munisípiu Bobonaro, Cirilo Moniz Sirio Berre, husu ba Ministériu Edukasaun (ME) atu tau orsamentu hodi rezolve eskola Ensinu Baziku Filiál (EBF) 30 de Agosto Ana-hun.

Líder komunitária ne’e konfirma, daudaun ne’e kondisaun fízika grave no la seguru ba estudante sira atu tuir proseu ensinu no aprendizajen iha aula laran.

Notísia relevante: Profesór na’in-rua iha EBF Anahun hanorin multi-klase

“Sala rua iha eskola ne’e kuaze ninia kondisaun la permite atu halo proseu aprendizajen, tanba didin no lantai dasar sira ne’ e ladún di’ak, ne’ebé ha’u husu governu atubele tau matan lalais, nune’e fasilita ita-nia oan sira bele tuir prosesu aprendizajen ho seguru,” nia informa ba jornalista sira iha Sede suku Odomau, segunda ne’e.

Koordenadór Eskola Ensinu Báziku Filiál (EBF) Primeiru no segundu siklu 30 de agosto Anahun, suku Odomau, postu administrativu Maliana, munisípiu Bobonaro, Imajen Tatoli/Sérgio da Cruz.

Xefe suku Cirilo haktuir, liuhosi enkontru nível munisipál kestaun ne’e autoridade lokál hato’o ona ba Diresaun Servisu Munisipál Edukasaun, Autoridade Munisípiu Bobonaro no Ministériu Edukasaun.

“Ami hein to’o agora laiha rezultadu, sira-nia resposta mak dehan buat hotu iha ona planu, hein atu implementa, agora implementa ne’e bainhira ne’e la’os kompeténsia xefe nian, ne’e kompeténsia governu nian, oinsá mak atu bele responde preokupasaun hirak-ne’e,” nia katak.

Komunidade Anahun, Leonito Perreira, preokupa tebes kondisaun eskola ne’e refere liuliu iha tempu udan no anin-boot.

“Kuandu tempu udan ho anin ne’e ami inan-aman antar sira mai de’it, tanba ami ta’uk, sira-nia eskola ne’e plafon no ai sira mos dodok hotu ona, sira mesak ki’ik-oan de’it ne’e mak buat ruma, profesór ida rua de’it atu haree sira barak ne’e oinsa loos, sé bele governu haree took meiu oinsá hadi’ak tiha eskola ne’e,” nia informa.

Eskola refere konstrui iha tinan 2009 ho totál sala rua. Enkuantu totál estudante ne’ebé tuir aprendizajen tinan letivu 2024 iha eskola ne’e hamutuk 47 mai hosi aldeia Galusapulu, suku Lahomea no aldeia Ana-hun, suku Odomau, postu administrativu Maliana.

Notísia relevante: Profesór 176 iha Bobonaro termina kontratu ho Ministériu Edukasaun

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!