MALIANA, 27 fevereiru 2024 (TATOLI)-Diretór Nasionál Transporte Terrestre (DNTT), Delegasaun Territoriál Munisípiu Bobonaro, José Paulo Henriques Baptista, husu ba motorista no na’in ba bís diresaun Maliana-Dili atu obedese ba regra no oráriu sirkulasaun loron ne’ebé Ministériu Transporte no Komunikasaun ho Polísia Nasionál Timor-Leste sei implementa iha fulan-marsu 2024.
Responsável DNTT Delegasaun territoriales Munisípiu Bobonaro ne’e informa, daudaun ne’e ekipa sira distribui ona formatu avizu konjunta ne’e ba motorista ho na’in ba bís idak-idak no halo esklaresimentu kona-bá razaun halo mudansa oráriu atu hahú viajen iha tempu loron.
Nia haktuir, iha tinan 2016 DNTT munisípiu Bobonaro konvoka ona enkontru ho na’in na bís auto carro hotu, atubele fó atensaun ba motorista sira, kumpre regra no oráriu sirkulasaun loron sira hasai, maibé durante ne’e motorista sira la obedese.
Notísia Relevante:Hahú marsu, bus hotu halo sirkulasaun iha tempu loron
“Ita-nia governu fó-sai ona avizu, tanba ne’e agora komesa marsu ne’e sira tenke obedese no komprimenta ba regra sira-ne’e, ose lakohi ita bele aplika regra tuir kódigu estrada no posiblidade ita bele hasai sira-nia lisensa, kuandu demaziadu, lakohi kolabora ho regra ne’ebé iha,” nia ko’alia iha Maliana, segunda ne’e.
Nia konsidera desizaun ne’e di’ak no ajuda tebes servisu DNTT munisípiu Bobonaro tanba durante tempu naruk ona halo esforsu halo atuasaun ba motorista sira-ne’ebé sempre tula pasajeiru viajen iha tempu kalan.
Nia hatutan, tuir estudu ne’ebé iha, viajen kalan ne’e la garante pontualidade, komfortável liuliu seguru ba pasajeiru sira no motorista rasik.
“Loloos ne’e ho distánsia Dili mai Maliana ne’e tarde liu ne’e oras lima, maibé realidade sira halo operasaun iha Dili kuaze hahú tuku 21:00 kalan to’o tuku 02:00 mak foin sai iha-ne’ebá, kalan feto klosan, katuas no ferik, labrik liuliu ema ho oan nurak sira tenke hein bís iha nakukun laran, kuitadu, depois la’o kalan ne’e kondutór matan dukur agora ne’e bele fó ameasa ba ema-nia vida,” nia katak.
Komandante Polísia Munisípiu Bobonaro, Superitendente Xefe Agustino Gomes da Silva, hateten PNTL munisípiu Bobonaro prontu kolabora no koordena ho DNTT atu ezekuta sirkulár refere tanba ne’e parte ida atu salva ema hotu nia vida.
“Ha’u akompaña de’it sirkulár ne’e iha mídia sosiál, maibé iha nível tatika komando munisípiu seidauk hetan ordem ne’e,maibé PNTL nia servisu atu konvense no obriga sidadaun hotu-hotu tenke kumpri avizu ne’ebé mak fó-sai, sé la kumpri konsekuensiamente tenke ser hetan reponsabilidade,” nia katak.
Tuir dadus ne’ebé DNTT munisípiu Bobonaro rejista hahú hosi tinan 2020 to’o 2022 bís auto carro ne’ebé halo operasaun diresaun Maliana-Dili hamutuk 32, hosi númeru ne’e 21 mak sei ativu hela tula pasajeiru
Notísia relevante: Kontinua Viajen kalan,DTT sei hasai lisensa bís Dili-Maliana
Jornalista: Sérgio da Cruz
Editór: Evaristo Soares Martins
