DILI, 28 fevereiru 2024 (TATOLI)-Ekipa Investigadór husi Prevedoria Direitu Umanu no Justisa (PDHJ, sigla portugés) hahú halo ona investigasaun ba profesór ne’ebé baku estudante ida iha eskola téknika vokasionál Becora.
Kazu ne’e akontese iha segunda (27/2) iha eskola eskola téknika vokasionál Becora iha ne’ebé profesór ida baku ho ai no basa estudante maibé estudante ne’e halo de’it auto-defeza ba nia aan no la halo asaun ruma tanba ema ne’ebé baku nia ne’e la’ós ema baibain maibé nia profesór no asaun profesór ne’e baku estudante ne’e virál ona iha rede sosiál Facebook.
Adjunta PDHJ asuntu Direitu Umanu, Maria Marilha Ximenes, hateten, ekipa investigadór PDHJ ba ona eskola téknika vokasionál Becora atu halo investigasaun kazu profesór baku estudante iha eskola referida.
“Ami seidauk simu keixa maibé horseik ami hetan ona vídeo kona-ba profesór ida ba estudante ida iha eskola STM Becora. Vídeo ne’e ha’u rasik manda tiha ona. Ami-nia diresaun fiskalizasaun no investigasaun no ohin sira investigaddór tuun ba baze iha eskola ne’e atu halo investigasaun ba kazu ne’e, liuliu halibur informasaun kle’an ba kazu profesór baku estudante ne’e,” Maria Marilha hateten ba jornalista sira iha Parlamentu Nasionál, kuarta ne’e.
Nia dehan, hanesan profesór ida niala devia halo asaun ida ne’e hasoru nia estudante, kuandu nia manorin nain mak halo asaun ne’e entaun asaun ida ne’e PDHJ konsidera hanesan krimi violasaun fíziku no aktu ida-ne’e konsidera katak kontra ona lei ne’ebé mak iha.
“Aktu ida profesór ne’e, PDHJ konsidera hanesan abuzu ida, tanba hanesan manorin-na’in la devia halo asaun sira hanesan ne’e. Tanba ne’e mak ami agora haree investiga, halibur informasaun sira ba kazu ne’e, karik iha investigasaun ne’e mak PDHJ iha violasaun duni PDHJ ba sei kontinua atende kazu ne’e ba oin tuir tuir artigu 8o husi estatutu PDHJ nian no artigu 27o husi konstitusaun RDTL,” nia konklui.
Jornalista: Natalino Costa
Editór: Rafael Ximenes de A. Belo
