iklan

INTERNASIONÁL, HEADLINE

Laos kontinua apoiu Timor-Leste hodi sai membru permanente ba ASEAN

Laos kontinua apoiu Timor-Leste hodi sai membru permanente ba ASEAN

LAOS, 29 fevereiru 2024 (TATOLI)- Hametin lasu amizade, Prezidente Repúblika, José Ramos Horta, hasoru malu ho nia omólogu Prezidente Repúblika Laos, Thongloun Sisoulith, iha Laos National Assembly Hall, kinta ne’e.

Iha hasoru malu ne’e, Laos reiteira nia kompromisu hodi kontinua apoiu adezaun Timor-Leste ba órganizasaun Sudezte-áziatiku.

“Estadu Laos suporta Timor-Leste hodi implementa planu nesesáriu sira hodi sai membru permanente ba ASEAN,” Sisoulith hateten.

Xefe Estadu Timor-Leste no Laos, iha ámbitu hasoru malu ne’e, reforsa importánsia hodi hametin lasu bilaterál no kooperasaun entre rejiaun rua espesiál liu ba Timor-Leste ne’ebé daudaun ne’e adere ona ba Organizasaun Mundiál Komérsiu (OMK) no espera katak adezaun ne’e bele lori benefísiu ba Timor-Leste hodi promove dezevolvimentu ekonomia no hametin kooperasaun ho nasaun membru sira.

Hafoin reuniaun, Prezidente Repúblika, José Ramos Horta, ho Thongloun Sisoulith asiste mós asinatura ba akordu ne’ebé halo husi Ministru Negósiu Estranjeiru no Kooperasaun ho Vise-primeiru-ministru no Ministru Negósiu Estrangeiru Laos iha área ekonomia, komérsiu no indústria no mós planu ba futuru iha troka ba propriedade Embaixada nian iha nasaun rua.

Durante iha Laos, Premiadu Nobel Paz ne’e hasoru malu mós ho Primeiru-Ministru Laos, Sonexay Siphandone no ajenda iha reuniaun maka deskute kona-ba área prioridade sira ne’ebé Timor-Leste presiza atu atinji no hametin relasaun diplomátika.

Hafoin reuniaun, Xefe Estadu Timor-Leste hamutuk ho delegasaun vizita mós Monumentu Unknown Soldiers (Red Star) hodi fó omenajen ba espíritu aten-brani erói no kombatente Laos nian ne’ebé luta ba revolusaun nasaun nian.

Vizita ofisiál Xefe Estadu nian iha Laos hodi hatan ba konvite Prezidente Repúblika Populár Laos.

Entretantu, Laos nu’udar nasaun ne’ebé lidera organizasaun ASEAN, iha ne’ebé Timor-Leste daudaun ne’e nia estatutu hanesan observadór no iha kumpromisiu atu adere ba.

Notísia relevante:Indonézia-Laos Importante Ba TL

Jornalista: Joanico de Araújo

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!