COVALIMA, 01 marsu 2024 (TATOLI) – Servisu Agrikultura Covalima distribui, iha fevereiru, ai-oan hamutuk 1.000 ba to’os-na’in sira iha postu administrativu Fatumea atu kuda iha ida-idak nia kintál.
“Plantasaun ai-oan ne’ebé mak fornese husi Diresaun Nasionál Ortikultura distribui de’it ba agrikultór sira iha Fatumea ne’ebé hakarak kuda, nune’e bele fó seguransa ba ai-oan ne’ebé mak Servisu Agrikultura distribui ba sira”, Diretór Agikultura Covalima, Lino Magno, hatete iha Tabakolot, ohin.
Nia haktuir katak, loloos ne’e atu hala’o serimónia lansamentu kuda ai-oan, maibé tanba laiha orsamentu entaun Servisu Agrikultura distribui direta de’it ba to’os-na’in ida-idak ho tipu plantasaun mak hanesan fini rambutaun, durian no has.
Administradór postu Fatumea, Cesar Madeira, relata katak, bazeia ba informasaun husi estensionista sira, Agrikultura Covalima distribui plantasaun 1000, maibé ai sira ne’e fahe mós ba instituisaun sira hanesan administrasaun postu, Sentru Saúde Fatumea no parte igreja atu kuda.
Lembra katak, eis-Diretór Agrikultura Covalima, Reinaldo Moniz Coli, informa antes ona atividade kuda ai-oan sei realiza iha postu Fatumea, Tilomar, Maucatar no Suai.
Tuir planu, Sentru viveiru permanente Ministériu Agrikultura, Pekuária, Peska no Floresta (MAPPF) nian iha Liquiçá-Maubara, Lautém-Pato, Viqueque-Ratau, no Manufahi-Betano sei foku ba produsaun ai-oan, iha tinan ne’e, hamutuk rihun 400 hodi distribui ba populasaun sira.
Tuir dadus 2023, totál ai-oan ne’ebé prodús hamutuk rihun 200 husi orsamentu ne’ebé maka aloka ba diresaun hamutuk rihun $100. Sentru viveiru Liquiçá prodús ai-oan rihun 60, sentru Lautém prodús 20.867, sentru Viqueque prodús 21.513 no sentru Manufahi rihun 24.
Notísia relevante: Agrikultura Covalima sei kuda ai-oan 1.700 iha postu haat
Jornalista: Celestina Teles
Editora: Maria Auxiliadora
