Deputadu KHUNTO husu estabelese postu saúde iha kada suku
DILI, 06 marsu 2024 (TATOLI)—Deputadu KHUNTO, Antonio Verdiál de Sousa, husu ezekutivu liuhosi entidade relevante atu estabeleses postu saúde iha suku ne’ebé seidauk iha postu saúde, nune’e lori antedimentu saúde besik liutan ba povu.
Notísia Relevante: MS halo mapamentu estabelese Postu Saúde iha territóriu nasionál
“Husu ba Govermu atu se bele harii postu saúde iha kada suku ne’ebé seidauk iha postu saúde no dook hosi postu saúde sira seluk,” nia hateten iha uma fukun Parlamentu Nasionál (PN).
Tuir nia, iha semana hirak liu ba nia parte hakat ba iha suku Obulo ho nia aldeia neen no populasaun lubun, no fila-fali mai iha postu administratrativu Letefoho, nune’e haree presiza ezekutivu tau matan tanba komunidade asesu ba postu saúde dook.
Jeografikamente Timor-Leste iha foho mak barak no distánsia hosi aldeia ida ba aldeia seluk ne’ebé dook tebes no dalaruma bele to’o kilómetru 10 to 15 hodi asesu ba fasilidade saúde sira.
“Tamba ne’e mak mosu mortalidade ne’ebé aas ba inan isin-rua, ne’ebé oras to’o ba partu, maibé la asesu ba postu saúde. Mosu mós mortalidade ba bebé tanba atendimentu ne’ebé tarde no fasilitasaun ne’ebé la kompletu,” nia dehan.
Nia hateten, se bainhira hari postu saude iha kada suku nak tenke kria mós kondisaun ba epsoál saúde sira hodi harii ba pesoal saúde sira hodi hela, atu nune’e sira-nia atendementu ba komunidade bele efetivu.
Jornalista : Nelson de Sousa
Editór : Cancio Ximenes
