iklan

COVALIMA, HEADLINE

Funsionáriu 71 iha Agrikultura Covalima kontinua serbisu ho voluntáriu

Funsionáriu 71 iha Agrikultura Covalima kontinua serbisu ho voluntáriu

Diretór Servisu  Munisipál Agrikultura Covalima, Lino Magno. Imajen/Celestina Teles.

COVALIMA,  08   marsu  2024 (TATOLI) – Diretór Servisu  Munisipál Agrikultura Covalima, Lino Magno, aprezenta ba Ministru Agrikultura, Pekuária, Peska no Floresta, Marcos da Cruz, no ba Prezidente Autoridade Covalima, Miguel Armada Cardoso, katak funsionáriu na’in-71 nafatin serbisu ho forma voluntáriu.   

“Ha’u aprezenta ba Ministru Agrikultura no Prezidente Autoridade Covalima atu rezolve problema funsionáriu ne’ebé serbisu ho voluntáriu to’o ohin loron seidauk asina kontratu”, Diretór Lino Magno informa ba ministru bainhira entrega ekipamentu ba agrikultór no peskadór sira, iha Tabakolot, ohin.

Tuir dadus, funsionáriu Servisu Munisipál Agrikultura Covalima hamutuk 143 kompostu husi funsionáriu permanente 67, ajente administrasaun 43, guarda florestál treinadu 22 no kazuál husi peska neen ne’ebé kontinua serbisu voluntariu.

Prezidente Autoridade Munisipál (PAM) Covalima, Miguel Armada Cardoso, hatán katak sei koordena ho Ministru Agrikultura atu solusiona kestaun ne’e, tanba kazuál balun la’ós serbisu direta ho PAM. “Ha’u fi’ar, ita-nian Sekretáriu Estadu Peska no Floresta sei fó atensaun”, nia garante.

Iha sorin seluk, Sekretáriu Estadu Floresta, Fernandinho Vierra, promete sei hamutuk ho Ministru Agrikultura solusiona funsionáriu kazuál sira ne’ebé kontinua servisu ho volontáriu.

“Ami membru Governu na’in-haat ne’ebé lidera husi Ministru Agrikultura Marcos da Cruz atu rezolve problema funsionáriu kazuál ne’ebé kontinua servisu ho voluntáriu, liuliu funsionáriu guarda florestál”, governante ne’e promete.

Nia husu ba pesoál guarda flofrestál iha Covalima kontinua serbisu tanba iha marsu sei rezolve funsionáriu kazuál nia problema, tanba ne’e tenke serbisu ho onestu no responsabilidade.

“Serbisu guarda florestá defende no asegura rekursu naturál iha rai-laran ne’ebé konsagra ona iha konstituisaun RDTL, nune’e ba guarda florestál balun ne’ebé envolve iha aktu ilegál sei hapara sira-nian kontratu”, afirma.

Notísia relevante: Kontratadu Guarda Florestál Covalima serbisu ho voluntáriu hodi hein desizaun

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!