BOBONARO, 12 marsu 2024 (TATOLI)- Ministru Agrikultura, Pekuária, Peska no Floresta (MAPPF), Marcos da Cruz, akompaña hosi Vise Ministru Komsersiu no Indústria, Augusto Junior Trindade no autoridade munisípiu Bobonaro, tersa ne’e kolleta Hare Nakroma ektare lima iha aldeia Raifun, suku Raifun no aldeia Manu-Aman, suku Tapo-Memo, postu administrativu Maliana liuhosi programa Demoplot ne’ebé implementa hosi Kámara Komérsiu no Indústria Timor-Leste (CCI-TL) servisu hamutuk ho PT Petrosidade Gresik Indonézia.
Ministru Marcos da Cruz, lori IX Governu nia naran agardese no fó apresia ba CCI-TL tanba ho insiativa ne’e hatudu katak setór privadu mos hahú partisipa ativa ba dezencolvimentu setór agrikultura liu-liu oinsá atu aumenta produsaun Hare iha rai-laran.
Notísia relevante: CCI-TL koopera ho KADIN Indonézia dezenvolve setór agrikultura
“CCI-TL marka diferensa ho dezenvolvimentu setór agrikultura ne’e iha pasadu, tanba ita hotu iha rai ida ne’e haree katak iha governu liubá setór privadu seidauk envolve direitamente iha prosesu dezenvolvimentu agrikultura nian, maibé ohin ita bele hatudu ona ba ita-nia rai katak setór privadu komesa ona atu partisipa ativamente ba iha prosesu dezenvolvimentu setór ida-ne’e, tanba setór ida importante ba vida ema-nia no nasaun nia,” nia hateten iha sede suku Raifun.
Vice Ministru Komérsiu no Indústria, Augusto Junior Trindade, hateten liuhosi programa ne’e hatudu katak CCI-TL iha duni komitmentu atu apoia setór agrikultura no dudu sa’e ekonomia rai-laran, nune’e bele redús foos importasaun.
“Agora CCI-TL ami ho komitmentu boot servisu ho PT Petrsoidade Gresik, hateten katak Hare ne’e kada ektare mínimu bele hetan tonelada 8 to’o 12, depois kolleta dala rua tán, imajina tinan ida kuda dala rua kolleta dala-haat de’it hetan ona tonelada 24 to’o 28. Sé ida-ne’e kali deit eskatre 1.000 iha Timor ita bele hateten katak la to’o tinan ida susesu, sé ida-ne’e akontese ita bele responde rasik nesesidade no redús osan barak sai liur,” Governante ne’e halo previzaun.
Reprezentante Prezidente Autoridade Munisípiu Bobonaro, Quintino Santos de Jesus, louva esforsu ne’ebé CCI-TL halo tanba ho sistema ne’e bele lori mudansa ba setór agrikultura.
“Ita bele lori agrikultura iha munisípiu Bobonaro ne’e avansadu liután, tanba ne’e reprezenta PAM, aparesia no agradese nune’e ba futuru ita-nia agrikultura sira bele sai modernu,” nia katak.
Biban ne’e, Prezidente CCI-TL, Jorge Serrano ,hateten insiativa ne’e realiza atu apoia governu, tanba dezenvolvimentu setór agrikultura iha Timor-Leste la’ós reponsabilidade Ministériu Agrikultura, Pekuaria, Peska no Floresta no Ministériu Komérsiu no Industria nia mesak.
“Agikultura ne’e ita hotu nian, ita tenke halo kampaña boot ida katak hasa’e produsaun, ne’e kampaña nasionál ida, timoroan hotu atu labele moris depende hahan hosi rai-li’ur, ita hakarak timoroan hotu kuda buat-ne’ebé nia haan no han buat ne’ebé nia kuda,” nia hateten.
Nia esplika, tuir loloos rezultadu kada ektare bele atinje mínimu tonelada 8 no másimu tonleda 12, maibé bazea ba estudu ne’ebé tékniku hosi PT Ptrosidade Gresik halo katak rezultadu ne’e seidauk másimu no foin atinje de’it 70%, tanba ladún hetan akompañamentu hosi agrikultór sira.
Nia dehan, ba oin sei servisu hamutuk ho PT Predosiza Gresik no apoia hosi Heneyken ho BNCTL sei kontinua implementa programa Demoplot iha munisípiu hotu-hotu ho objetivu atu kore dependénsia hosi rai-li’ur.
Hafoin kolleta, Ministru Agriklultura no ekipa CCI-TL mós halo diálogu ho agrikultór sira iha Maliana latu koalia kona-bá futuru agrikultura iha Timor-Leste no produsaun oinsá atu dignifika agrikultór sira-nia produtu asesu ba merkadu ho presu di’ak no bele halo exportasaun ba rai-li’ur tanbaTimor-Leste adere ona ba Organizasaun Mundiál Komérsiu.
Notísia relevante: PN konsidera adezaun OMK fó espasu ba TL asesu merkadu globál
Jornalista: Sérgio da Cruz
Editór: Evaristo Soares Martins
