DILI, 14 marsu 2024 (TATOLI)—Diretór Servisu Munisipál Água Saneamentu iha Autoridade Munisípiu Dili (AMD), Domingos Godinho, informa, iha abríl, Autoridade Munisípiu Dili, implementa ona sansaun ba loja xineza sira ne’ebé soe lixu hamutuk ho komunidade sira.
Asuntu ne’e ligadu ho xineza ida tula fo’er ho karreta privadu ho númeru matrikula B-15-003 TL ne’ebé fakar fo’er hamutuk ho lixu komunidade iha parte Dili laran ho nune’e Diretór Servisu Munisipál Água Saneamentu AMD sei fó sansaun, bainhira sensibilizasaun informasaun ne’e ramata.
“Ba fulan abríl mak ita hetan tan xineza sira fakar fo’er hamutuk ho lixu komunidade ita fó kedas sansaun. Agora daudaun foto ne’ebé virál media sosiál ne’e ita seidauk fó ba sira, tanba ita-nia sosializasaun daudaun ne’e la’o hela,” Domingos Godinho, via WhatsApp ba TATOLI, ohin.
Diretór ne’e esplika, lei iha ona atu bandu ema hotu so’e fo’er arbiru iha dalan públiku no mós iha fatin ne’ebé de’it.
“Se ita-boot sira la tuir regra sira ne’e mak sei hetan koima tanba tuir lei númeru 3/2024 ne’e hateten katak se mak so’e foer arbiru, ema se de’it mak hetan bele halo keixa ezemplu komunidade ida mak hetan se de’it so’e foer arbiru bele keixa mai ami, tanba ita interrese hakarak sidade Dili ne’e moos entaun lei fó dalan ba ema hotu atu halo keixa,” nia hateten.
Ezekutivu ne’e esplika, Rekursu umanu husi Saneamentu la presiza tuun ba baze atu haree, maibé hanesan komunidade nafatin fó kontribuisaun nune’e Dili ne’e moos tanba daudaun ne’e rekursu umanu menus AMD tau ba planu 2025 mak hodi halo prosesu rekrutamentu tanba tinan 2024 laiha planu atu halo rekrutamentu ba pesoál sira.
“Iha tinan ida ne’e ita la iha planu atu halo rekrutamentu tanba ha’u mai kontinuasaun servisu ne’e iha fulan fevereiru, entaun antes ne’e kolega sira seluk mak halo planu sira ne’e maibé la tau, ho nune’e ha’u-nia planu ba 2025 mak tau prioridade hodi halo rekrutamentu atu hira mak ita presiza depois mak ha’u fó informasaun ba ita-boot (jornalista),” nia subliña.
Iha sorin seluk, Xefe Departamentu Saneamantu Munisípiu Dili, Domingos do Santos Soriano, dehan, bazeia ba dekretu lei 33/2008, se mak so’e foer arbiru sei hetan sansaun nune’e iha fulan novembru 2023 bainhira sirkular Autoridade Munisípiu Dili ho númeru 835/2023 nian ne’ebé fó sai tan katak se mak so’e foer arbiru sei hetan sansaun no selu koima husi $ 5 to’o $500.
“Ami-nia sirkular husi AMD distribui ona ba loja sira iha kapitál Dili ne’ebé, mak halo atividade negósiu sira katak bainhira prodús lixu ida idak ba soe iha Tibar ezetu ba lixu komunidade mak empreza lokál sira ba ra’ut no ba so’e iha Tibar,” Domingos dos Santos Soriano, dehan.
Nia dehan, bainhira haree loja-na’in sira mak so’e foer iha lixu-fatin AMD sei fó koima $500 hanesan komunidade baibain mak so’e fo’er arbiru tenke haree nia so’e lixu ida oinsá ne’e fó $5 ba leten.
Jornalista: Felicidade Ximenes
Editór: Rafael Ximenes de A. Belo
