iklan

NASIONÁL, SAÚDE

Janeiru-marsu 2024: HNGV rejista pasiente fase raan hamutuk 20

Janeiru-marsu 2024: HNGV rejista pasiente fase raan hamutuk 20

Médiku Gustavo do Rosário da Cruz. Imajen Tatoli/Felicidade Ximenes

DILI, 18 marsu 2024 (TATOLI)–Espesialista Neofrolojia iha Hospital Nasionál Guido Valadares (HNGV), Gustavo do Rosário da Cruz, hateten hahú hosi janeiru to’u marsu ne’e, HNGV rejista pasiente foun fase raan hamutuk 20.

“Hosi janeiru to’o ohin loron ne’e, ita iha pasiente foun ba fase raan ne’e hamutuk 20. Iha feto no mane ho númeru ne’ebé hanesan,” Espesialista Gustavo do Rosário da Cruz hateten ba jornalista sira, iha serimónia entrega mákina USG ba Vise USG ba Vise-Ministru ba Operasionalizasaun Ospitál iha Ministériu Saúde (MS), Flávio Brandão, hosi Yayasan Dana Berkah Utama Indonesia, iha Caicoli.

Nia hateten, pasiente hamutuk 115 iha tinan ida-ne’ebé barak lahalimar hodi halo tratamentu fase raan no sura ho pasiente tinan kotuk.

Hosi janeiru ne’e, pasiente hamutuk 15 mak husu alta iha HNGV no balun fila ba kontinua halo tratamentu.

Iha tinan ida-ne’e, HNGV seidauk halo transferensia pasiente ne’ebé fase raan ba iha rai-li´ur, tamba iha ekipamentu sufisiente ne’ebé profisionál saúde sira fó atendimentu ba pasiente.

Pasiente balun deziste hosi tratamentu tanba laiha akomodasaun iha Dili hodi hela. Maske ekipa médiku esforsu buka fatin hanesan husu ajuda ba Fundasaun Klibur Domin maibé dalaruma labele hetan, nune’e husu Governu bele tau atensaun ba iha situasaun sira hanesan ne’e.

Husu kona-ba rekursu umanu ka profisionál saúde hodi atende pasiente sira, nia hatán, maske iha rekursu maibé presiza aumenta atu bele hakmaan serbisu iha unidade hemodialize.

Nia hatete, iha unidade hemodialize, ekipamentu ba atende pasiente sira hanesan mákina ba fase raan nian ne’e sufisiente tanba iha mákina unidade hamutuk 14.

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!