Yayasan Dana Berkah Utama entrega mákina USG ba MS

DILI, 18 marsu 2024 (TATOLI)–Yayasan Dana Berkah Utama hosi Indonézia, segunda ne’e, entrega mákina USG unidade ida ho marka Mindray Z5 ba Ministériu Saúde (MS) iha Palacio das Cinzas, Caicoli, Dili.

Yayasan Dana Berkah Utama entrega mákina Mindray Z5 ho folin Rp 145.000.000 ne’e ba Vise-Ministru ba Operasionalizasaun Ospital, Flavio Brandão Mendes de Araújo, hodi bele ajuda médiku sira iha servisu unidade Hemodiálise iha Hospital Nasionál Guido Valadares (HNGV).

Xefe Yayasan Dana Berkah Utama Indonesia, Funnywati Sucipto, hateten maske nia ema Budista maibé sente kontete oferese mákina ba Timor-Leste lahare ba relijiaun no iha kompaixaun ba situasaun pasiente sira.

“Objetivu hosi apoiu ne’e mak atu bele ajuda profisionál saúde hodi atende pasiente sira. Mákina ida-ne’e bele ajuda ona médiku iha ospital atu bele konsulta pasiente sira. Mákina USG ne’e nia funsaun barak bele leno mós kabun,” Xefe Yayasan Dana Berkah Utama Indonesia, Funnywati Sucipto, hateten ba jornalista sira iha serimónia entrega mákina ba MS, iha salaun Ministériu Saude, Caicoli.

Iha fatin hanesan, Espesialista Nefrolojia iha HNGV, Gustavo do Rosário da Cruz, relata pasiente iha Timor-Leste ne’e barak, tanba ne’e mak doadór husu ba nia hodi bele oferese mákina USG ne´e ba iha ospitál.

Gustavo do Rosário da Cruz esplika, mákina USG ne’e bele ajuda profisionál saúde sira atu atende pasiente sira, tanba ekipamentu USG iha HNGV ne’e menus.

“Ha’u aprezenta prosposta ida ba iha Yayasan husu USG ho marka ida-ne’ebe mak kualidade. Sasán ne’e ba povu Timor. USG serve ba buat barak atu leno ita-nia orgaun sira, molok halo sirurjia no bele mós leno ba fuan,” nia dehan.

Nia hateten, mákina ne’e sei apoia servisu profisionál saúde sira-nian iha Unidade Hemodiálise iha HNGV hodi bele ajuda pasiente sira-ne’ebé hetan problema renál.

Jornalista : Jesuína Xavier

Editór       : Cancio Ximenes