DILI, 25 marsu 2024 (TATOLI) – Prezidente Repúblika, José Ramos Horta, segunda ne’e, kondekora Xefe Misaun Organizasaun Internasionál ba Migrasaun (OIM) Aishath Ihma Shareef, ho medalla méritu Timor-Leste.
“Medalla méritu ne’e hodi rekoñese lideransa Shareef ne’ebé durante ne’e
orienta OIM hodi fó nia apoia ba halo esforsu dezenvolvimentu nasionál Timor-Leste nian,” refere nota ne’ebé Agêcia Tatoli,I.P asesu husi portal Presidensiál Repúblika.
Notísia relevante: IOM apoia $200.000 ba CVTL implementa programa redusaun risku dezastre
Kondekorasaun ne’e ho baze ba dekretu prezidensiál loron 12 fulan-Marsu, Prezidente Repúblika no iha utilizasaun ninia podér sira ne’ebé prevee iha artigu 85 parágrafu j) Konstituisaun Repúblika, hamutuk ho artigu 2 Dekretu-Lei númeru 15/2009, loron 18 fulan-Marsu, hodi entrega Medalla Méritu ba Xefe Misaun Organizasaun Internasionál ba Migrasaun (OIM), Aishath Ihma Shareef.
Durante misaun IOM nian iha Timor-Leste kolabora ho Governu Timor-Leste hahú tinan 2002 kona-ba sistema jestaun fronteira, polítika migrasaun, fasilita remisaun husi traballadór timoroan sira iha rai-li’ur, no área xave sira seluk.
Medalla méritu, ne’ebé harii liuhusi Dekretu-Lei iha tinan 2009, rekoñese membru militár, polísia no sivíl sira, nasionál no internasionál, ne’ebé kontribui maka’as ba pás, estabilidade no dezenvolvimentu demokrásia iha Timor-Leste.
Hafoin serimónia medalla ne’e, Prezidente Ramos Horta kontinua hala’o sorumutuk ho Diretór-Jerál IOM, Ugochi Daniels, hodi diskute kona ba organizasaun nia servisu iha Timor-Leste.
OIM fó apoia ba Timor-Leste desde tinan 1999, hodi fó asisténsia iha área sira hanesan resposta emerjénsia, jestaun migrasaun, kombate tráfiku umanu, no fasilita reintegrasaun no rekuperasaun sustentavél.
Notísia relevante: IOM apoia Governu liuhosi área jestaun fronteira-tráfiku umanu-mobilidade laborál
Jornalista: Hortencio Sanchez
Editór: Florencio Miranda Ximened
