Empreza Água Nova instala bee-moos iha HNGV
DILI, 26 marsu 2025 (TATOLI)–Empreza Água Nova Unipesoál, Lda, hosi Macau Xina instala bee-moos iha Hospitál Nasionál Guido Valadares (HNGV), hodi ajuda pasiente sira internada no halo redusaun mós ba lixu plástiku iha Timor-Leste.
“Ida-ne’e nia benefisia bo’ot tebetebes ba pasiente sira internada hela iha HNGV. Kapasidade bomba bee ne’e iha 100,5 KW, ne’ebé loron ida, nia bele prodús bee litru rihun tolu to’o rihun lima iha oras 24 nia laran. Entaun, kapasidade ida-ne’ebé ita bele dehan boot no sufisiente, bele responde ona ba nesesidade bee-moos iha HNGV, liuliu fornese ba ita-nia pasiente sira-ne’ebé baixa iha HNGV,” Diretora Administrasaun Finansa, Lojistíka no Aprovizionamentu, iha HNGV, Sara Maria. F. Xavier, hateten iha nia diskursu, iha lansamentu ba bee-moos iha HNGV, tersa ne’e.
Aleinde ne´e, nia dehan, bele redús ona vizitór sira-ne’ebé mak sempre mai vizita moras sira-ne’ebé baixa iha HNGV hodi lori água mai husi li´ur, tanba ne’e mak husu xefe departamentu sira atu avizu ba pasiente no familia sira atu asesu bee-moos ne’ebé kompañia instala iha aredór HNGV nian.
Tuir nia, relatoriu teste laboratóriu hatudu katak instalasaun bee-moos livre ona hosi mikroorganizmu no seguru atu bele konsome, entaun funsionáriu, visitor, pasiente no familia sira lapresiza hasai osan sosa bee iha kioske sira iha HNGV.
Jerente Empreza Água Nova Unipesoál, Lda, Kam Chio Lao, hateten kompañia sente haksolok tebes tanba bee hanesan element importante bae ma-nia moris loroloron.
“Ha’u hakarak hatudu ha’u-nia felisidade, tanba bee hanesan elementu ida importante tebes ba ita ema-nia moris. Bee ne´ebé seguru no saudável ne’e demanda komun ida ba ema hotu,” nia hateten.
Nia konsidera, ida-ne’e aspetu ida-ne’ebé defísil tanba ne’e mak empreza hakarak fó mákina fornese bee-moos ho konfiansa no seguransa hosi kompaña Àgua Nova.
Kam Chio Lao hanoin hikas fali katak Governasaun Macau ho Timor-Leste iha relasaun di’ak loos, tanba ne’e mak nia hakarak investe nia mákina ne’e mai Timor-Leste ho intensaun hakarak halo doasaun garatuita ba HNGV.
“Antes ne´e, ha’u servisu liu tinan 30 ho governasaun Macau, entaun hatene situasaun Timor ne’e oinsá, hanesan mós problema lixu. Entaun, depois nia governasaun iha Macau hakarak investe iha bee-moos, tanba hakarak redús lixu plástiku iha terotóriu Timor laran nomos ba nasaun sira ko´alia dalen portugés,” nia dehan.
Nia hateten, nia parte hahú kedas apoia Timor-Leste iha tempu propagasaun COVID-19 no nia parte mós ajuda no sei oferese bee-moos ba iha Palásiu Governu no Palásiu Prezidensiál Nicolau Lobato, Bairru Pite.
Jornalista : Jesuína Xavier
Editór : Cancio Ximenes
