SEI propoin integra sistema monitorizasaun no avaliasaun iha KRP 2027
DILI, 25 Agostu 2026 (TATOLI)—Sekretária Estadu Inkluzaun (SEI) propoin proposta sistema monitorizasaun no avaliasaun (M&E-Monitoring and Evaluation) iha diskusaun Komité Revizaun Polítika (KRP) 2027.
Sekretária Estadu Inkluzaun, Elvina Sousa, hateten ohin SEI hamutuk ho entidade relevante sira seluk aprezenta kona-ba Inkluzaun sosiál iha Komité Revizaun Polítika (KRP).
“Proposta sira-ne’ebé mak ami submete atu kria sistema monitorizasaun no avaliasaun atu rejista númeru kazu sira no benefisiáriu sira, entaun iha desizaun ho kondisaun atu ami halo fali ajustamentu proposta ne’e lori fali mai iha KRP,” Sekretária Estadu Inkluzaun, Elvina Sousa, hateten ba jornalista sira iha Ministériu Finansa, ohin.
Governante ne’e dehan, sistema ne’e bele deteta númeru benefisiáriu ba programa sira-ne’ebé SEI iha, númeru feto sira-ne’ebé hetan violénsia, hetan asisténsia no sira seluk tan. Bainhira sira iha baze dadus sira-ne’ebé kredível no konfiável entaun SEI sei halo servisu ho di’ak liután.
Enkuantu, nia hatutan, kona-ba programa Inkluzaun sosiál ne’e ohin iha diskusaun la’o di’ak tebes no sira haree kona-ba atu intensifika servisu kampaña nasionál ba violénsia bazeadu iha jéneru.
“Tanba kuaze sosiedade sivíl no liña ministeriál sira seluk mós halo ona kampaña maibé laiha mudansa ka kontinua aas. Ne’ebé ami hanoin katak iha proposta ida, ami sei lansa kampaña boot kona-ba prevensaun violénsia bazeadu ba jéneru iha Timor-Leste,” nia dehan.
Jornalista : Alexandra da Costa
Editór : Cancio Ximenes
