iklan

COVALIMA, HEADLINE

Agrikultór iha Beilaku kestiona estensionista kona-ba serbisu distribuisaun fini hare

Agrikultór iha Beilaku kestiona estensionista kona-ba serbisu distribuisaun fini hare

Agrikultór Bernardo Barreto. Imajen/Celestina Teles.

COVALIMA, 02 Abríl 2024 (TATOLI) – Agrikultór Bernardo Barreto lamenta ho serbisu estensionista sira kona-ba distribuisaun fini hare, tanba hamosu diskriminasaun.

“Ami iha aldeia Beilaku, suku Raimea, postu Zumalai maioria halai natar, maibé estensionista sira distribui fini ba nia família, la distribui ba grupu agrikultór sira ne’ebé halai natar”, Bernardo hato’o preokupasaun, ohin.

Nia lembra katak Ministériu Agrikultura Pekuária, Peska no Floresta liuhusi parseiru HAPAS/SAPIP forma ona grupu ualu iha aldeia referida iha tinan 2023, maibé la hetan apoiu fini husi estensionista. Grupu ne’e mak hanesan Hae-oan ho nia membru na’in-24, Fuan Domin nia membru-18, Moris Foun A membru 23, Moris Foun B 12, Beilaku-Hudak 18, Leo-Lima 18, Plared 17 no Beisoe 20.

Aleinde-ne’e, Bernardo mós kestiona kona-ba polítika Governu nia ba apoia kombustivel gratuita atu fila agrikultór sira-nia rai, maibé iha implementasaun hamosu diskriminasaun tanba la liuhusi grupu, maibé fó ba indivíduu ka ba família.

Iha sorin seluk, xefe aldeia Beilaku, Crispim Gonzaga, hateten agrikultór kestiona tanba nia parte simu mós orientasaun husi estensionista atu rekolla dadus agrikultór sira hodi hetan fini husi Servisu Munisipál Agrikultura Covalima, maibé hafoin rekolla dadus sira lahetan fini hare Nakroma.

“Ha’u rekolla dadus agrikultór-sira atu hetan ajuda fini hare Nakroma husi Governu, depois rekolla dadus hotu atu submete ba iha estensionista, maibé nia hatán fini laiha ona”, esplika.

Nu’udar autoridade lokál, Crispim konfirma asuntu ne’e ba estensionista katak fini ne’ebé atu distribui ba agrikultór iha aldeia Beilaku fahe fali ba iha munisípiu Manufahi.

Responde ba kestaun ne’e, Xefe Departamentu Estensaun Programa no Agríkola Covalima, Mariazinha Gonçalves Barros, klarifika katak estensionista Zumalai distribui fini la hamosu diskriminasaun, tanba fahe fini hare Nakroma ba grupu agrikultór husi postu Tilomar, entaun nia laiha família iha ne’ebá.

“Fini hare Nakroma tonelada 20 ne’e ita fó apoiu de’it ba postu administrativu sira ne’ebé halai natar hanesan iha Zumalai tonelada 16 no ba Suai tonelada haat de’it, oinsá mak bele hamosu diskriminasaun”, nia kestiona.

Mariazinha Barros salienta katak estensionista distribui fini hare ba grupu agrikultór ne’ebé presiza, la’ós distribui hotu ba komunidade, tanba molok ne’e balun hetan ona fini.

Tuir dadus 2023, Governu fó apoia fini hare Nakroma ba Servisu Agrikultura Covalima hamutuk tonelada 20 ne’ebé iha faze dahuluk fó tonelada 16 no daruak tonelada haat.

Jornalista: Celestina Teles

Editora:  Maria Auxiliadora

iklan
iklan

Leave a Reply

iklan
error: Content is protected !!