Dom Norberto husu joven sira kria situasaun hakmatek
BOBONARO, 02 abríl 2024 (TATOLI) – Bispu Dioseze Maliana, Dom Norberto do Amarál, husu ba joven sira-ne’ebé envolve-aan iha grupu arte-marsiál atu hadomi malu hanesan maun-alin atubele kria situasaun hakmatek iha rai-laran.
Prezidente Konferénsia Episkopál Timorense (CET, sigla portugés) hato’o kestaun ne’e, tanba iku-ikus ne’e joven sira iha kapitál Dili, sempre provoka malu, tuda-malu, baku-malu no oho-malu.
Notísia relevante: Bispu Maliana-Baucau triste haree joven kontinua tuda-malu
“Ha’u husu joven sira atubele hatuur-aan di’ak oituan ba atu nune’e bele halo situasaun ida-ne’e estabilidade nia laran, hanoin kona-bá moris,tanba moris ida-ne’e dala-ida de’it, mate la moris ona,n e’e duni tenke kuidadu-aan didi’ak,” nia informa ba jornalista sira iha Malina, tersa.
Amu-lulik ne’e haklaken, la kleur tan Timor-Leste sei simu vizita ofisiál hosi Amu Papa, tanba ne’e joven sira presiza kria pás no estabilidade nune’e atividade hotu bele la’o ho susesu.
“Sira presiza la’o didi’ak, hatudu-aan didi’ak ba hodi hala’o de’it ita-nia moris ida, maske iha situasaun ida-ne’ebé ita hatene katak difisil, maibé beibeik ita bele rezolve hotu,” nia katak.
Notísia relevante: PNTL Dili halo operasaun “la’o ain” hodi garante seguransa iha tempu kalan
Jornalista: Sérgio da Cruz
Editór: Evaristo Soares Martins
