iklan

EDUKASAUN

Estudante UNDANA halo sensibilizasaun kona-ba inundasaun no impaktu ba saúde públika

Estudante UNDANA halo sensibilizasaun kona-ba inundasaun no impaktu ba saúde públika

Estudante husi program mestradu FKM Universidade Nusa Cendana, Kupang-Indonézia hamutuk ho Estudante FKM, Universidade Dili. Imajen/FKM Undana

DILI, 09 abríl 2024 (TATOLI) – Universidade Nusa Cendana (UNDANA), Kupang-Indonézia liuhusi estudante mestradu Fakuldade saúde públika (FKM, sigla indonézia) hala’o sensibilizasaun kona-ba inundasaun no nia impaktu ba saúde públika iha Timor-Leste (TL).

Materia ba sensibilizasaun ne’e foka liu ba variavel sira ne’ebé mak fó impaktu hamosu indunsaun no ba saúde públika hanesan malária, dengue, infesaun vias respiratória (ISPA), leptospirosis, moras kulit (dermatitis), diáreia no seluktan, husi estudante mestradu UNDANA na’in haat hanesan Manuel Gusmão Carvalho, Manuel Belo Sarmento, Noe Gaspar Pinto, Elizabet Belo no akompañada husi Xefe Departamentu Saúde públika, UNDIL, Fitri Kusumasari no Dekana Fakuldade siénsia saúde UNDIL, Joaninha Carvalho de Jesus.

“Sosializasaun ida-ne’e envolve estudande ne’ebé tuir mak hanesan estudante Fakuldade siénsia saúde semestre I, II, III, IV no V hamutuk ema na’in 73,” Estudante UNDANA relata, tuir komunikadu ba TATOLI, ohin.

Partisipante sira iha atividade sensibilizasaun husi estudante UNDANA. Imajen/FKM

Materia sensibilizasaun ne’e, alende ko’alia kona-ba indundasaun no nia impaktu ba saúde públika, inklui mós Jestaun Mitigasaun Inundasaun hanesan:

  • Périgu (hazard) – fenómena naturál no atividade umana;
  • Nível vulneravilidade (vulnerability) populasaun nian hasoru inundasaun, no;
  • Risku ne’ebé mak mosu. Bele konsidera nu’udar dezastre bainhira nível kapasodade atu atende dezastre ki’ik liu kompara ho périgu ne’ebé mak posível akontese;

Nune’e mós kauza inundasaun, hanesan:

  • Tensidade udan maka’as no udan tau kle’ur;
  • Superfísie rai ne’ebé mak tuun kompara ho tasi-been;
  • Área ne’ebé mak lokalizada iha rai-kle’an ne’ebé mak hale’u husi morru no sulin ba tasi;
  • Hela-fatin barak ne’ebé harii mota-ninin;
  • Soe lixu ba mota
  • Desmatamentu (tesi-ai arbiru);
  • Falta kanalizasaun bee;

Bazea ba kauza ne’e, iha sensibilizasaun ne’e, ko’alia mós oinsá halo prevensaun, katak:

  • Labele soe lixu arbiru iha mota;
  • Akollementu ba sedimentasaun iha mota-laran;
  • Kuda ai-horis besik mota;
  • Halo lágoa resaparan/sirkulasaun bee;
  • Labele konstroi uma ka rezidénsia iha mota-ninin no mós área inundasaun;

Nune’e mós, prevensaun paska-inundasaun:

  • Hamoos uma-laran husi lixu no fo’er sira seluk ne’ebé mak inundasaun lori ba iha fatin lixu (lixeira), no hamoos fatin oioin hanesan didin-lolon no rai ho desinfetante;
  • Kuidadu ka evita uza bee-matan hanesan bee posu no torneira, tanba admiradu akontese ona kontaminasaun líkidu ne’ebé mak la saudavel ba isin-lolon, maske nono uluk ona antes konsumu;
  • Uza ekipamentu protesaun ne’ebé mak to’os hanesan sapatu bainhira la’o iha bee-nalihun, taka asesu oioin ne’ebé iha poténsia sai knuuk ba animál, hanesan laho;
  • Hasa’e rezisténsia isin-lolon ho komsome hahán ne’ebé mak besik ne’ebé mak la afetadu, karik mosu kanek ruma bainhira halo limpeza nune’e mós evakuasaun;

Eventu akadémiku ne’e hala’o bazea ba Tridarma universidade nian katak Edukasaun /Manorin, Peskiza no Asaun sosiál ba komunidade.

Iha biban ne’e, estudante sira entuziasmu no kontente tanba konsidera matéria refere bele sai hanesan referensia ida uainhira iha dezastre naturál ruma mosu liliu inundasaun, sira iha ona koñesementu ne’ebé preparadu hodi bele tulun ita-nia komunidade sira iha baze.

Iha parte seluk, Dekanu no Xefe Departamentu Saúde Públika  apresia ba atividade sensibilizasaun ida-ne’e, “tanba atividade ida-ne’e bele ajuda estudante sira-nia koñesementu uainhira sira hala’o prátika iha terrenu”.

 

Tatoli

iklan
iklan

Leave a Reply

iklan
error: Content is protected !!