AINARO, 11 abríl 2024 (TATOLI) – Xefe Suku Aitutu, Grigorio Lopes Pereira, dehan iha suku ida-ne’e iha aldeia tolu mak durante seidauk asesu ba eletrisidade.
“Iha Suku Aituto iha aldeia tolu mak seidauk asesu eletrisidade, Goulolo, Hatubuti no Mau-Lefo ho totál populasaun hamutuk 350”, Grigorio Lopes hateten ba jornalista sira hafoin akompaña Sekretáriu Estadu Komunikasaun Sosiál Expedito Dias Ximenes ba observa konstrusaun Tore transmisaun RTTL, EP iha foho Fleixa, kinta, ohin.
Aleinde problema eletrisidade, Grigorio hatutan, iha aldeia haat mak hela dook hosi sidadade. Aldeia hirak ne’e mak Goulolo, Hatubuti Mau-Lefo no Russulau to’o agora mós seidauk asesu ba estrada.
“Suku Aituto iha Aldeia hitu no Aldeia haat mak durante seidauk asesu ba estrada mak hanesan Goulolo Hatubuti Mau-Lefo no Russulau no komunidade iha aldeia ne’e susar atu asesu ba estrada”, nia salienta.
Nia dehan, hanesan autoridade lokál, iha tinan ida-ne’e la taka matan ba problema sira ne’e.
“Komunidade sira iha ne’e sente preokupadu liu mak bee, eletrisidade no estrada hanesan xefe suku foun ha’u sei relata problema ne’e ba Administradór Postu Maubisse no Administradór Munisípiu Ainaro atu rezolve problema ida-ne’e no hanesan Autoridade Suku Aituto sei esforsu hodi ko’alia ho ita-nia parseiru hodi ajuda reabilita ita-nia estrada”, nia afirma.
Iha sorin seluk, Administradór Postu Administrativu Maubisse, Joquim Salsinha, hateten tinan ne’e sei foku ba halo identidikasaun ba estrada sira iha suku sira iha Maubisse atu oinsá ita bele halo reabilitasaun.
“Horseik ami halo enkontru ho Konsellu Konsultivu Postu Administrativu Maubisse no Xefe Suku sira ami ko’alia atu halo identifikasaun ba problema sira iha suku iha Maubisse laran hanesan fatin ne’ebé mak seidauk asesu ba estrada, bee moos no eletrisidade atu ita tau iha planu tinan ne’e hodi relata ba Administradór Munisipál Ainaro nune’e ita bele rezolve problema sira”, nia konklui.
Suku Aitutu iha populasaun 6.131, kompostu hosi aldeia hitu, mak Aihou, Airaca-Lau, Betulala, Goulolo Hatubuti Mau-Lefo no Russulau.
Jornalista: Natalino Costa
Editór : Zezito Silva
