VIQUEQUE, 15 abríl 2024 (TATOLI)-Reprezentante Idozu aldeia Fatu-Mantolu, Suku Uagia, postu Ossu, munisípiu Viqueque, Manuel Marsal Freitas, husu Governu liuhusi Ministériu Sosildade Sosiál no Inkluzaun (MSSI) ba Institutu Nasionál Seguransa Sosiál (INSS) aumenta funsionáriu koloka iha munisípiu Viqueque hodi alesera prosesu atendementu ba ferik no katuas sira.
“Uluk sistema pagamentu ne’e ami-nia naran dala ruma mosu fallansu banku haruka ami bá foti deklarasaun husi suku, depois bá banku ita bele simu ona osan. Maibé, agora deklarasaun husi suku ita lori bá banku lavale fali ona. Ne’ebé ami to’o iha banku haruka ami tenke bá foti memo husi INSS Viqueque hafoin lori banku hodi foti osan,” Manuel Marsal Freitas, hateten ba jornalista sira, iha resintu INSS Beloi, ohin.
Ho situasaun ne’e, Manuel sente triste tanba idozu balun hela liu iha área rurál, idozu balun kondisaun idade avansadu la’o labele no balun difísiensia, maibé obriga sira-nia an tenke bá trata memo iha INSS maka foin foti osan iha Banku.
“Maibé, ami haree funsionáriu servisu iha INSS Viqueque ne’e ema na’in ida maka fó atendementu ba idozu sira-ne’ebé pagamentu fallansu sira-ne’e. Ohin dadersan ami hein iha INSP Viqueque to’o mai agora atendementu seidauk hotu to’o ami-nia maluk balu hamlaha tanba ne’e maka ami hakarak husu ba Governu liuhusi MSSI aumenta rekurus umanu atu aselera prosesu atendementu ba idozu sira,” nia sujere.
Alende ne’e, nia dehan, sistema pagamentu uluk ba benifísiariu idozu ne’ebé la’o labele halo pagamentu iha sira-nia rezidénsia, maibé agora pagamentu ida-ne’e labele benefisiáriu rasik tenke ba INSS hodi foti memo maka bá simu ona iha banku. Ida-ne’e sai difikuldade ba idozu idade avansadu sira sira-nia movimentu, tanba ne’e Governu mós tenke haree asuntu sira hodi fasilita ita-nia idozu sira.
Iha fatin hanesan, Xefe Suku Builo, postu Ossu, Osorio da Silva, haktuir dadauk ne’e idozu barak mak kontinua hein iha INSP hodi trata sira-nia dokumentu no sistema atendementu ne’e difikulta tebes ba idozu sira.
“Agora ita haree idozu husi postu Ossu, Uatucarbau, Uatulari hobur iha ne’e hodi trata sira-nia dokumentu ida memo ne’e, maibé atendementu tarde liu.Ha’u rasik mós lori ha’u-nia benifísiariu idozu na’in sia husi suku Builo husi dadeer to’o agora seidauk atende. Nune’e ha’u rekomenda ba Governu atu hafasil sistema atendementu tenke aumenta funsionáriu INSS destaka iha munisípiu hodi aselera atendementu ba ita-nia idozu sira,” nia rekomenda.
Tuir observasaun jornalista Agência TATOLI, iha resintu INSS Viqueque idozu kuaze na’in-80 resin difisiénsia na’in rua kontinua hein edifísiu INSS Beloi trata sira-nia dokumentu memo no balu halo komfirmasaun naran idozu.
Jornalista : Vitorino Lopes da Costa
Editór : Rafael Ximenes de A. Belo
