DILI, 16 abríl 2024 (TATOLI) – Prezidente Repúblika José Ramos Horta ho Embaxadora Portugal iha Timor-Leste, Manuela Bairos, diskute asuntu billaterál entre nasaun rua.
“Ko’alia ho Prezidente Repúblika kona-ba asuntu billaterál entre Portugal ho Timor-Leste. Iha tinan ida ne’e, ita sei halo negosia programa foun kona-ba kooperasaun ninian liuliu tau prioridade ba asuntu joventude,” Embaxadora ne’e hateten ba jornalista sira iha Palásiu Prezidensiál Bairru-Pite Dili, tersa ne’e.
Diplomata Portugal ne’e dehan, prontu apoiu joven Timor-Leste iha área oioin liuliu iha formasaun lian portugés no atividade seluk ne’ebé impotante hodi kontribui ba dezenvolvimentu.
Alende ne’e parte rua ko’alia mós kona-ba loron 20 fulan-abríl, xefe Estadu mós sei viajen ba Portugal hodi partisipa komemorasaun tinan-50 revolusaun ai-funan Kravu ne’ebé sei akontese iha 25 abríl.
“Ha’u ko’alia ho Prezidente kona-ba tempu besik Prezidente sei vizita ba Portugal tanba nia hanesan konvidadu espesiál husi Prezidente portugés hodi ba partisipa komemorasaun tinan-50 revolusaun ai-funan. Komemorasaun ne’e importante tanba 25 abríl ne’e loron ida Portugal fó liberade ba koloniál sira hotu atu atu hetan liberdade, ne’ebé nasaun koloniál sira partisipa hotu,” nia konklui.
Entretantu, Portugal no Timor-Leste nu’udar membru direitu plenu ba organizasaun luzófona ka Komunidade hosi país ho lian Portugés (CPLP, sigla portugés), iha relasain istórika no diplomátika.
Nasaun rua ne’e, halo ona kooperasaun oioin hanesan Edukasaun, seguransa no defeza, inklui área seluk relevante.
Jornalista: Hortencio Sanchez
Editór: Rafael Ximenes de A. Belo
