OÉ-CUSSE 16 Abríl 2024 (TATOLI) – Ministériu Saúde (MS), liuhusi Kuidadu Saúde Primária hamutuk ho autoridade Rejiaun Administrativa Espesiál Oé-Cusse Ambeno (RAEOA) realiza, durante loron rua, semináriu hodi partilla informasaun no halo planu integradu ba prevensaun no mitigasaun ba moras raiva iha Oé-Cusse.
Diretóra-Jerál Kuidadu Saúde Primária, Elisabet Leto Mau, esplika katak objetivu hosi semináriu ne’e mak halo mós elaborasaun ba Planu Asaun Anuál (PAA) no ezekusaun integrada ba surtu raiva no halo sensbilizasaun kona-ba impaktu husi moras ne’e.
“Ohin ekipa hosi nasionál mai atu ajuda ita-nia kolega sira iha Oé-Cusse, tanba iha fulan kotuk ekipa mai harii ona sira-nia pilár hamutuk ualu. Entaun, atu haree filafali apoiu, halo planu tanba antes ne’e referénsia iha ona no planu sira-ne’e ekipa sei haree liu ba orsamentu nian ba kada pilár sira no planu atividade atu hala’o iha kada pilár,” Elisabet Leto Mau dehan iha otél Ambeno Oé-Cusse.
Nia esplika katak, durante semináriu entre loron 16 no 17 ne’e, kada pilár sei aprezenta nia planu estratéjiku sira kona-ba polítika prevensaun moras raiva iha Oé-Cusse kompleta ho nia orsamentu, nune’e ba oin kada pilár bele hala’o nia knaar tuir planu ne’ebé maka iha ona.
Notísia relevante:MS distribui HRIG bá RAEOA no HNGV prevene rabies
Sekretáriu Rejionál ba Asuntu Saúde, Luís de Jesus Neno, reprezenta Prezidente Autoridade RAEOA agradese ba Governu Sentrál tanba bele apoia Servisu Saúde Oé-Cusse kona-ba prevensaun raiva.
“Ohin, ami hamutuk iha ne’e atu kria planu ida, nune’e rezolve kazu raiva ne’ebé mosu iha Oé-Cusse. Espera katak liuhusi tuur hamutuk ne’e bele tau ideia, tanba ita mesak labele, persiza apoia formasaun ba profisionál sira, nune’e bele rezolve surtu ne’e no ba komunidade sira mós bele prevene aan hosi kazu ida-ne’e”, nia salienta.
Oé-Cusse nu’udar rejiaun enklave ne’ebé fronteira direta ho país viziñu no nia númeru asu tata ema to’o agora iha ona 77, hosi totál ne’e rejista pozitivu ida ne’ebé mate ona.
“Orientasaun ne’ebé ita fó, asu ne’ebé tata tenke mate, labele moris, no asu sira ne’ebé haki’ak tenke kesi atu hetan vásina”, afirma.
Pilár ualu ne’ebé Servisu Saúde estabelese mak dahuluk, responsabiliza kona-ba planeamentu, monitorizasaun no avaliasaun, daruak, kona-ba komunikasaun risku, datoluk, sobre vijilánsia no tempu implementasaun.
Pilár dahaat kona-ba jestaun ba kazu, dalimak, apoia laboratóriu, daneen, apoia ba vasinasaun, dahituk, apoia atendimentu pasiente iha ospitál referál no pilár ikusliu mak apoia finansa no lojístika.
Notísia relevante: Númeru asu tata ema iha Oé-Cusse sa’e ba 77
Jornalista: Abílio Elo Nini
Editora: Maria Auxiliadora
