Antes 20 maiu, PN ratifika tratadu adezaun OMK
DILI, 17 abríl 2024 (TATOLI) – Prezidente Parlamentu Nasionál (PPN) Maria Fernanda Lay, hatete, antes tama ba 20 maiu, Parlamentu Nasionál halo ona ratifikasaun ba adezaun Timor-Leste nian ba Organizasaun Mundiál Komérsiu (OMK).
“Governu husu antes tama ba 20 maiu tenke ratifika, entaun ami sei ratifika antes 20 maiu. Tratadu ne’e asina ona, Governu lori ona ba Parlamentu, iha ne’ebá ami sei la muda virgula ida, la muda pontu ida entaun ami ratifika de’it,” Fernanda Lay hatete ba ba jornalista sira iha Palásiu Prezidensiál Bairru-Pite Dili, kuarta ne’e.
Rekorda fali katak, Governu Timor-Leste asina ona pakote adezaun Timor-Leste ba OMK iha loron 26 fevereiru 2024, iha Abudabi, ho partisipasaun husi Prezidente Repúblika, José Ramos Horta, no PPN, Fernanda Lay inklui setór privadu sira.
Hafoin asina, Governu presiza submete protokolu adezaun ba Parlamentu Nasionál hodi hetan ratifikasaun no iha períodu másimu to’o jullu tinan ne’e tenke submete konfirmasaun ba loron-30 atu ekipa OMK tanba presiza responsável rejista Timor-Leste ofisialmente sai membru plenu.
Timor-Leste nia esforsu adere ba OMK inisia iha novembru 2016 no iha loron 07 dezembru 2016 Konsellu Jerál estabelese Grupu Traballu, nune’e hafoin tinan-14 Grupu Traballu prepara dokumentu nesesáriu sira hodi kumpre regra OMK.
Iha loron 01 outubru 2020, Timor-Leste realiza enkontru Grupu Traballu dahuluk ho nasaun membru OMK sira hodi diskute ho kle’an kona-ba seriedade aplikasaun sai membru planu.
Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.
Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.
Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.
OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.
Jornalista: Hortencio Sanchez
Editór: Rafael Ximenes de A. Belo
