MCI: Relatóriu foos subsídiu husi empreza rua submete ona ba MKAE

DILI, 18 abríl 2024 (TATOLI)—Diretora Nasionál Regulasaun Komersiál iha  Ministériu Komérsiu no Industria (MCI), Manuela  da Silva  Tilman, hateten, relatóriu  foos subsídiu husi Empreza Kreativu Furak no Alfa Dili, submete ona ba Ministériu Koordenadór Asuntu Ekonómiku (MKAE).

“Empreza Kreativu Furak no Alfa Dili sira kompleta ona sira-nia dokumentu foos subsídiu nune’e iha semana kotuk ami submete ona ba Vise-primeiru Ministru no Minsitru Koordenadór Asuntu Ekonómiku no Ministru Turizmu no Ambiente,” Manuela da Silva Tilman informa ba TATOLI iha nia kna’ar fatin MCI Bebora, ohin.

Nia dehan, durante ne’e Alfa Dili nia dokumentu kompletu, maibé Kreativu Furak no Perisos mak dokumentu problema uituan, ho nune’e MCI fó karta no husu sira atu hadi’a fila fali.

“Empreza Kreativu Furak haruka ona sira-nia dokumentu orijinál mai no ami verifika katak tuir ona dadus   ne’ebé mak iha, entaun   ami submete ona relatóriu sira ne’e ba MKAE,” nia esplika.

Ezekutiva ne’e afirma, Empreza Perisos seidauk submete fila fali relatóriu mai, entaun parte MCI nian seidauk hetan resposta ruma husi sira.

“Durante sira-nia dokumentu ne’ebé mak sira haruka mai ne’e komplikadu. Dokumentu sira ne’e dalaruma nota ne’e rasik la temi empreza nia naran iha laran.  Nota mai deklarasaun oin seluk no nota naran oin seluk no ativdade lisensa laiha. Maibé, ami konsegue verifika duni mak detekta; sira dokumentu falla barak los, entaun to’o agora sira seidauk resposta fali mai, maibé ami hein hodi submete ba MKAE,” nia haktuir.

Diretora Nasionál Regulasaun Komersiál MCI ne’e relata, atu prosesa pagamentu ida-ne’e desizaun husi Vise-primeiru Ministru no Ministru Koordenadór Asuntu Ekonomiku no Ministru Turizmu no Ambiente.

“Agora halai ona ba prosesa pagamentu ida-ne’e la’ós kompeténsia ami  nian, maibé ami-nia kompeténsia mak prepara dokumentu,  atu prosesu pagamentu MKAE mak hatene ,”nia hateten.

Iha sorin seluk, Diretór Empreza Perissos, James Jong, hateten sira simu ona karta husi MCI atu hadia dokumentu foos subsídiu hafoin submete fila fali iha tempu-badak.

“Ami simu karta husi ekipa verifikasaun MCI, entaun agora daudaun ami haree no hadia, tanba dokumentu barak, maibé iha fulan ida-ne’e nia laran ami sei submete fila fali ba Governu nune’e bele halo ona pagamentu,” James Jong, konklui.

Jornalista : Felicidade Ximenes

Editór: Rafael Ximenes de A. Belo