Konsidera kontribui lixu, ekipa SEATOU hasai pneu a’at iha tasi-ibun Pantai Kelapa
DILI, 19 abríl 2024 (TATOLI)–Ekipa konjunta ne’ebé lidera husi Sekretaria Estadu Asuntu Toponímia Organizasaun Urbana (SEATOU), sesta ne’e, kontinua halo serbisu rutina organiza sidade Dili, hanesan hasai pneu (roda) sira ne’ebé antes ne’e grupu Brigada Ambientál implementa programa resiklajen iha tasi-ibun.
Ekipa ne’e kompostu husi SEATOU, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Jestaun Merkadu Munisípiu Dili no entidade relevante seluk tan.
Sekretáriu Estadu Asuntu Toponímia Organizasaun Urbana, Germano Santa Brites Dias, hateten, atividade ne’ebé ekipa konjunta halo hanesan limpeza jerál.
“Objetivu ita hasai sira ne’e tanba kontribui ba lixu. Roda sira ne’e tidin hakiak laho iha laran no kontribui ba susuk no lori moras ba ita, entaun hasai maibé ita foti de’it ida ne’ebé ladi’ak no ita husik ida-ne’ebé maluk sira halo ona modelu hanesan kadeira ho meza di’ak ne’e, ita nunka sobu buat ne’ebé halo di’ak ona,” Sekretáriu Estadu informa iha Bidau Senggol.
Notísia relevante : Brigada Ambientál halibur lixu transforma sai jardín verde
Nia dehan, pneu ne’ebé tau iha tasi-ibun tau ne’e di’ak maibé dalabarak kria fali buat ladi’ak hanesan kontribui lixu.
“Ita hotu hatene fatin ne’ebá hanesan protokolu no Embaixada boboot nia oin hanesan Embaixada Xina no Embaixada Koreia, entaun ema barak kestiona no SEATOU rasik mós haree la di’ak, tanba ne’e tenke hasai nune’e bele kontribui sidade ne’ebé moos,” nia akresenta.
Biban ne’e, governante ne’e husu ba komunidade bainhira bá tasi-ibun, karik kadeira balun ne’ebé husik hela bele uza maibé nafatin uza konsiénsia hodi soe lixu ba ninia fatin.
“Nune’e ita-nia rai ne’e livre hosi lixu, ita hotu la gosta lixu maibé ita rasik kontribui lixu ne’e, lixu kontinua nakonu iha sidade Dili,” nia tenik.
Ekipa konjunta halo serbisu bazeia ba ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Jardín verde
Pneu sira ne’ebé ohin ekipa konjunta hasai, antes ne’e kria husi Sekretaria Estadu Ambiente (SEA) liuhosi serbisu volutáriu Brigada Ambientál, ne’ebé halibur lixu hanesan masa bee mamuk no pneu a’at sira hodi transforma sai jardín verde iha área tasi-ibun.
Prosesu halo jardín verde hahú loron 13 janeiru to’o 11 fevereiru 2022 no SEA halo inaugurasaun iha loron 14 fevereiru 2022.
Membru Brigada Ambientál, Gilberto da Silva Correia, hateten, membru sira rekolla lixu masa bee mamuk hamutuk 1.000 iha tasi-ibun no dalan ninin iha Dili laran inklui pneu ne’ebé foti iha ofisina sira.
“Ami serbisu ho voluntarizmu hodi halibur lixu ne’ebé komunidade soe hodi transforma sai jardín verde. Ida-ne’e hanesan ami-nia inisiativa rasik hodi hamenus lixu sira iha Dili no bele fó ezemplu di’ak ba joven seluk,” nia dehan.
Inisiativa ne’e mosu bazeia ba konseitu ambiente mundiál hodi redús lixu, ne’ebé hanaran Reduce Re-use and Recycle (3R) ka redús, utiliza no resiklajen, nune’e bele kria ambiente moos.
Brigada Ambientál haktuir, sira enxe rai-henek iha masa bee mamuk sira ne’ebé rekolla no hada modelu hanesan batako hodi sai lutu inklui pneu halo sai hanesan meza no kadeira.
Hafoin harii jardín verde, Brigada Ambientál sira tau avizu kona-ba oinsá labele soe lixu arbiru no sei kuda mós ai-funan oioin hodi hafurak jardín.
Jornalista : Arminda Fonseca
Editora : Julia Chatarina
