DILI,19 abríl 2024 (TATOLI)— Ministériu Turizmu no Ambiente (MTA) preve orsamentu ho montante rihun-100 USD atu halo reabilitasaun ba Cristo Rei (CR) no João Paulo (JP) II Tasi-tolu maibé relasiona ho planu ba prezensa Sua Santidade Papa Francisco mai Timor-Leste (TL) mak Ministériu Obras Publika (MOP) no Ajénsia Dezenvolvimentu Nasionál (ADN) mak halo fali reabilitasaun.
“Iha planu 2024, Ministériu Turizmu no Ambiente prevee orsamentu ba reabilitasaun ba sítiu rua hanesan Cristo Rei no João Paulo II, hamutuk 100 mil, maibé agora realidade ita haree katak vizita husi Amu Papa mai ita-nia rain, entaun ita labele reabilita ba fatin refere, tanba direita ona hosi MOP no ADN,” Rosita Garcia de Sousa, informa ba TATOLI iha nia kna’ar fatin MTA, Farol, ohin.
MTA liuhusi Diresaun Nasionál Turístika, esplika, husi reabilitasaun ne’e la’ós halo ba fatin ki’ik, maibé reabilita buat boot, entaun direitamente MOP no ADN. Agora planu ne’ebé mak Ministériu Turizmu no Ambiente iha durante ne’e mak atu hadia de’it buat kiik sira, hanesan lampu ruma a’at bele hadia no eskada sira ne’ebé mak tohik bele taka fila fali no haris fatin sira a’at bele hadi’a.
“Maibe agora direitamente husi MOP no ADN kaer ne’e obra ne’ebé mak boot, entaun sira haree liu ba dalan, lampu sira ne’ebé mak iha, jardin sira, inklui dalan ba iha parte kotuk,” Rosita Garcia de Sousa relata.
Nia dehan, Ministériu Turizmu no Ambiente prevee orsamentu ba sítiu rua atu reabilita mak la konsegue, osan sira ne’e sei utiliza ba sítiu sira seluk ne’ebé mak iha.
“Osan ne’e ita sei responde ba sítiu sira seluk inklui haree fila fali ba jardim sira ne’ebé mak iha 2023 iha Dili, hanesan espasu verde liu-liu ba jestaun jardin nian,” nia informa.
Entertantu, iha 2023 Governu reabilita ona jardin neen iha Dili, hanesan Jardim 5 de Maio, Largo Lecidere, Farol, iha Palásiu Governu oin, Jardin Babadok iha Mandarin no Motael 12 de Novembro.
Jornalista : Felicidade Ximenes
Editór: Rafael Ximenes de A. Belo
