DILI, 22 Abríl 2024 (TATOLI) – Grupu haki’ak boek iha Metinaro, iha suku Saburi, munisípiu Dili presiza fundu atu konstrui tanke no halo reabilitasaun ba tanke rua ne’ebé eziste ona, nune’e bele asegura boek ne’ebé sira haki’ak.
Xefe Grupu haki’ak boek, Carlos da Silva, haktuir katak tanke sira ne’e ladún di’ak tanba sira uza hela sistema tradisionál. Tanba ne’e, sira presiza atu hetan apoiu ruma husi Governu, liuliu Ministériu Agrikultura atu kria kondisaun ba boek ne’ebé sira haki’ak.
“Ami iha kolam rua maibé seidauk di’ak, ami uza de’it tradisionál. Ami presiza fundu husu Governu atu halo di’ak liután”, Carlos da Silva dehan iha Comoro, ohin.
Tanba ne’e, grupu aprezenta ona pedidu ba ministériu atu tulun sira hodi kria tan tanke rua no reabilita tanke seluk ne’ebé iha ona.
Nia relembra katak sira hahú haki’ak boek iha 2021. Daudaun barak ona no fahe ona ba fatin rua, ida sira tau fini boek no seluk tau boek ne’ebé boot ona hodi hein atu kolleta. Boek sira ne’e ema barak mak sosa ona no kada kilógrama $5.
Nia dehan osan sira hetan ne’e halo fali jestaun hodi sosa hahán ba boek, nomós balun apoia ba grupu ne’ebé kompostu husi ema na’in-lima hodi sustenta nesesidade família nian.
“Osan sira ne’e la sufisiente atu uza hodi hadi’ak kondisaun kolam boek nian, maibé fiar katak Governu sei aprova pedidu ne’ebé sira submete ona ba ministériu”, nia dehan.
Diretór-Jerál Peska, Akikultura no Jestaun ba Rekursu Akuátiku, Celestino da Cunha Barreto, haktuir katak sira iha ona lista grupu sira ne’ebé haki’ak boek iha fatin tolu hanesan iha Dili iha Metinaro, Ataúro iha Makadadi no Maliana parte Loes nian, maibé Governu seidauk fó fundu ba grupu sira. Tanba ne’e, nia sei halo esforsu atu tinan oin bele tau orsamentu sufisiente hodi tulun ba grupu tolu atu hadi’a kondisaun hodi haki’ak boek.
“Durante ne’e ita-nia grupu tolu ne’e halo rasik jestaun hodi jere sira-ninia negósiu. Ita espera katak tinan oin bele iha fundu hodi apoiu ba sira, nune’e ita bele hadi’a kondisaun ne’ebé sira enfrenta”, nia garante.
Jornalista: Tomé Amado
Editora: Maria Auxiliadora
