DSMKRN Bobonaro halibur reseita rihun $28-resin
BOBONARO, 23 abríl 2024 (TATOLI) – Diresaun Servisu Munisipál Konservatóriu Rejistu Notariadu (DSMKRN) Munisípiu Bobonaro, iha fulan janeiru to’o fevereiru tinan 2024 ne’e rekolla reseita hamutuk rihun $28,025 hodi kontribui ba kofre Estadu.
Diretór Servisu Munisipál Konservatóriu Rejistu Notariadu Munisípiu Bobonaro, Marcelino Mali Loe, esplika, taxa hirak-ne’e halibur hosi ema na’in-559 ne’ebe mai trata no renova pasaporte Timor-Leste.
Notísia relevante: Notariadu Bobonaro reativa atendimentu pasaporte
“Ami atende iha janeiru feto hamutuk 55 no mane 60 hamutuk 115 ho nia taxa rihun $5,750, mai fali iha fevereiru ami atende feto 175, mane 269 no totál 444 ho taxa hamutuk $22,275, totál janeiru ho fevereiru rihun $28,025,” nia informa ba jornalista sira iha kna’ar-fatin, segunda ne’e.
Diretór Marciano afirma, iha fulan marsu no abríl laiha reseita tanba dezde loron 21 fulan-fevereiru ne’e kedas Diresaun Jerál Notariadu orienta suspende provizóriu atendimentu pasaporte ba komunidade sira ho razaun mákina avaria.
Nia observa durante suspende atividade ne’e komunidade sira sempre mai direita husu informasaun, tanba balu presiza tebes atu hetan pasaporte liuliu sira-ne’ebé atu servisu no ba konsulta iha rai li’ur.
“Ami iha-ne’e fó hatene de’it katak, karik ita-boot sira urjente ruma ami halo despaxu ruma atubele atende de’it iha nasionál. Ha’u mós hakarak fó hanoin ba komunidade katak la’ós ita-nia kaderneta mak laiha, maibé mákina mak avaria tiha, agora iha ona prosesu aprovizionamentu, ha’u la promete katak bainhira mak di’ak, ami hein de’it husi nasionál, naran katak prepara dokumentu,” nia katak.
Diresaun refere mós enfrenta problema seluk tanba dezde tinan 2018 prodús de’it Billete Identidade ho surat tahan mutin.
“Ita-nia mákina Fargo ne’e aat to’o agora seidauk di’ak, ita nia esforsu nafatin aban bainrua sira bele iha planu lori mai, ne’ebé agora ami fó provizóriu de’it,” nia hateten.
Notísia relevante: Komunidade kestiona Notariadu Bobonaro kona-bá sistema atendimentu BI no Sertidaun RDTL
Jornalista: Sérgio da Cruz
Editór: Agapito dos Santos
