IGEADI normaliza ona estrada iha Lour
BOBONARO, 30 abríl 2024 (TATOLI)-Institutu Jestaun Ekipamentu Apoia Dezembolvimentu Infrastrututa, Institutu Públiku (IGEADI.IP, sigla portuguéses) Brigada Maria-Tapo, konklui ona normalizasaun estrada iha suku Lour, postu administrativu Bobonaro, munisípiu Bobonaro, ne’ebé hetan estragus hafoin akontese erosaun iha loron 03 fulan jullu tinan 2023 liubá.
Estrada ne’ebé IGEADI,IP halo normalizasaun durante loron lima ne’e ho distánsia kilómetru ida-resin.
Xefe suku Lour, Miguel Lopes Gomes, agradese ba IGEADI,IP ne’ebé konsege responde ona pedidu ne’ebé hato’o maski hein kleur.
Notísia relevante: Estrada aat iha Lour, Governu seidauk normaliza
“Ninia prosesu ke naruk tebes, hanesan Autoridade suku, ha’u esforsu meiu hotu-hotu ha’u halo mas iha fulan-abríl ne’e ha’u kria pedidu urjénsia ida ba Prezidente IGEADI,IP iha loron 01 abríl, liutiha semana ida hetan kedas responde hosi Prezidente, daudaun ne’e sira-ne’ebé fó impaktu ba movimentasaun komunidade, daudaun ne’e normaliza ona, ekipa IGEADI mos fila ona, agora movimentu la’o bainbain ona,” nia informa ba Tatoli, iha Bobonaro,tersa ne’e.
Tuir nia, ho normalizasaun ne’e fasilita ona movimentu komunidade atu asesu ba merkadu no nesesidade seluk, tanba durante tinan ida-resin, difikulta sirkulasaun transporte husu suku Lour ba postu administrativu Bobonaro no kapitál Maliana.
Xefe suku Miguel mos nafatin rekomenda ba Autoridade Munisipál Bobonaro no Governu sentrál atu kontinua tau-matan ba kondisaun estrada referidu, tanba normalizasaun ne’ebé IGEADI,IP halo ladún garante atu uza ba tempu naruk.
“Ita haree normalizasaun emerjénsia ne’e ninia pursentu ne’e ki’ik tebes,nla ateru ninia implikasaun mos bo’ot tebes, ita bele hateten kuandu udan ne’e mai beibeik, tama fulan ida rua nia bele hetan estragus fila fali, tahu nakonu fali ona, tanba ne’e ministériu presiza tau nafatin iha planu,” nia hateten.
Tuir dadus suku Lour iha aldeia haat mak hanesan Olo-Olo, Helikei, Galitaz no Thasgolo ho nia totál Populasaun 1,440 kompostu hosi feto 725, mane 715 no totál uma-kain 200, xefe família 315.
Notísia relevante: Obra Públika Bobonaro sei halo levantamentu ba kondisaun estrada Lour
Jornalista: Sergio da Cruz
Editór: Evaristo Soares Martins
