Komisaun B husu investiga kazu tiru joven ida iha Covalima

DILI, 02 maiu 2024 (TATOLI)—Vise Prezidente komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), Luis Roberto, husu parte kompetente atu halo investigasaun kle’an ba pesoál ida husi serbisu sekretu ne’ebé lori arma tiru kanek joven na’in-ida iha munisípiu Covalima.
“Informasaun ne’ebé iha horikalan akontese iha Covalima, membru ida husi serbisu sekretu ne’ebé mak uza arma tiru kanek joven balun, ne’ebé kanek iha kotuk laran, hanesan membru komisaun B trata asuntu Defeza no Seguransa husu órgaun kompetente sira atu bele halo investigasaun kle’an,” nia hateten ba jornalista sira iha resintu Parlamentu Nasioná, kinta ne’e.
Tuir nia, presiza iha investigasaun kle´an hodi hatene motivu loloos uza arma hodi hakanek joven ida.
Deputadu membru komisaun B, David Dias Ximenes ‘Mandati’, mós husu autoridade kompetente presiza halo investigasaun kle´an hodi bele hatene loloos motivu husi akontesimentu ne’e.
Kazu tiru joven iha Covalima submete ba investigasaun
Komandante Jerál Polísia Nasionál Timor-Leste (PNTL) Komisáriu Jerál Polísia, Henrique da Costa, hateten kazu pesoál serbisu sekretu ida -ne’ebé tiru joven ida iha munisípiu Covalima daudaun ne´e submete ona ba prosesu investigasaun.
Insidente ne’e akontese iha kuarta (01/5) horisehik maizamenus iha tuku 20h00 kalan, iha pesoál husi serbisu sekretu ida ho arma tiru kanek joven ida iha munisípiu Covalima no motivu hosi kazu ne’e seidauk hatene loloos.
“Ita foin hetan mak informasaun inisiál de’it, katak iha insidente ida iha Colvalima, envolve husi ita-nia pesoál serbisu sekretu ida. Maibé, motivu ne’e ita seidauk hetan tanba sei iha hela prosesu depois hetan mak portavós Komandu PNTL sei aprezenta ba ita-boot sira,” Henrique da Costa hateten ba jornalista sira hafoin simu vizita delegasaun Badan Nasional Narkotika (BNN) Repúblika Indonézia iha Kuartel Jerál PNTL Caicoli, kinta ne’e.
Hafoin akontesimentu ne´e, Komandu Jerál PNTL orienta kedas komandante munisípiu Covalima, Superintendente Polísia, Calisto Gonzaga, hodi tún ba iha terrenu observa fatin akontesimentu ne´e.
“Depois insidente, ha’u hetan kedas kontaktu hosi komandante munisípiu Covalima no depois ida-ne’e ita orienta kedan komandu munisípiu Covalima hodi konfirma kona-bá iha informasaun ne’ebé mak iha. Hafoin komandu munisípiu Covalima tun ba iha terrenu, nia haree iha duni akontesimentu iha fatin rua, nune’e nia ho membru sira normaliza kedan situasaun iha fatin ne’ebá no nia identifika duni, katak iha duni membru ida serbisu sekreta mak envolve iha insidente ne’e,” nia dehan.
Hafoin akontesimentu laiha asaun ne’ebé pertuba orden públika, tanba komandu PNTL Covalima ho nia membru sira asegura tiha kedan fatin akontesimentu.
“Komandu Munisipiu normaliza kedas situasaun no situasaun iha fatin akontesimentu aseguradu. No, depois ida-ne’e, ita mós informa kedan situasaun ne’e ba iha Diretór Jeral Serbisu Nasionál Intelejénsia ho mós Xefe Estadu Maiór Jenerál F-FDTL para sira mós hatene,” nia dehan.
Komisáriu ne’e, lahatene pesoál serbisu sekretu ida-ne’ebé mak envolve loos iha insidente ne’e, tanba polísia sei halo hela prosesu investigasaun ba kazu ne’e.
“Ha’u hakarak hateten dala ida tán ba kazu ida-ne’e polísia agora sei halo hela prosesu investigasaun,” nia dehan.
Jornalista : Nelson de Sousa
Editór : Cancio Ximenes

