Abertura jogu Holsa Cup, Madiran empata ho Oplegul A 1-1
BOBONARO, 02 abríl 2024 (TATOLI) – Ministériu Juventude, Desportu, Arte no Kultura hamutuk ho Autóridade Munisipál Bobonaro, kinta ne’e halo abertura ba jogu futeból Holsa Cup tinan 2024 ne’ebé realiza iha kampu suku Holsa, postu administrativu Maliana ho totál klubu 10.
Jogu ne’e realiza ho objetivu atu anima komunidade suku Holsa hodi komemora loron restaurasaun independénsia 20 de maiu ba da-22.
Eventu ne’e abertura ofisialmente hosi Prezidente Autóridade Munisipál Bobonaro, Alexandrino Pires, akompaña hosi Xefe Gabinete MJDAK, Prezidente Asosiasaun Futeból Bobonaro, Domingos Gouveia Moniz, Prezidente Konfederasaun Desportu Timor-Leste Munisípiu Bobonaro, Mário Soares.
Prezidente Autoridade Munisipál Bobonaro, Alexandrino Pires, orgullu no apresia komisaun organizadora Klibur Matadalan ba Dezenvolvimentu suku Holsa (KMDSH) ne’ebé iha inisiativa di’ak hodi realiza eventu ne’e.
Nia hatutan, Autóridade Munisipál Bobonaro konsidera futeból importante tebes no presiza atu dezenvolve tanba foin sa’e barak iha talentu ba área desportu.
Nia apela ba jogadór sira hatudu jogu ho disiplina no esportividade, nune’e ba oin bele partisipa iha eventu futeból munisipál no nasionál sira.
Notísia relevante: Klubu 10 sei kompete iha eventu futeból Holsa Cup 2024
“Ha’u hatete só bola ne’e mak halibur ema, fó kontente ba ema, ne’ebé imi joga karik lalika hanoin, tebe bola la kona ain sa’e-malu, ne’e labele. Ha’u tenke ser ko’alia ida-ne’e tanba la’ós tempu atu konflitu, ita mesak Bobonaro-oan hotu deit, ida-ne’e mak ita hotu nia hakarak, aproveita oportunidade ne’ebé iha ezerse imi-nia talentu ne’ebé iha, tanba períodu ke mai ne’e ita sei halo jogu ida ké boot, la’ós iha Maliana de’it, munisípiu seluk sei konsentra hotu iha ne’e, ho taxa ne’ebé boot,” nia hateten iha kampu futeból Holsa.
Xefe Gabinete MJDAK, esklarese, governu deside fó apoia ba eventu ne’e atu hatudu katak atividade desportu komunitária sei la mate.
Liga ba asuntu ne’e, nia husu ba jogadór sira atu kuda unidade iha jogu laran, tanba desportu atu anima ema no habelun malu hanesan família no maun-alin.
Sorin seluk, Prezidente Asosiasaun Futeból Bobonaro, Domingos Gouveia, louva ho inisiativa KMDSH tanba bele hamoris fila-fali jogu Holsa Cup ne’ebé mate dezde 2004.
“Hau mós hakarak fó hatene jogu suku Cup ne’e hahú kedas iha 2001, ha’u rasik mak loke konsege realiza to’o 2004, ohin hahú fila fali, ha’u hanesan Holsa oan kontenti, ha’u prontu apoiu,” nia katak.
Nia promete AFB mos sei tau-matan jogadór di’ak sira iha eventu ne’e, hodi bele sai fini ba munisípiu Bobonaro.
“Ha’u husu imi hatudu sportifitas, labele joga ho brutu, ne’ebé hatudu imi-nia talentu no kapasidade, atu nune’e asosiasaun bele hola naran, hodi reprezenta munisípiu Bobonaro ba joga nível nasionál,” nia akresenta.
Iha abertura Jogu ne’ebé la’o durante minutu 90 nia laran, klubu Madiran no Oplegul A tenke termina ho rezultadu impata 1-1, tanba ekipa rua idak-idak defende ninia rede metin.
Golu rua ne’e rezulta iha jogu faze dahuluk ne’ebé parte klubu Madiran marka hosi jogadór Marculino (9) no Opelgul (A) marka hosi Adelino Salvador (14). Jogu ne’e hetan seguransa husi Komandu Polísia Nasionál Timor-Leste no apoia primeiru sokoru hosi Cruz Vermelha Timor-Leste (CVTL) filiál Maliana.
Enkuantu taxa rotativa ne’e hetan apoia orsamentu husi MJDAK ho montante $2,500 liuhusi fundu derportu komunitária, alende ne’e apoia hosi kompañia lokál Holsa oan hamutuk $280, nune’e mos apoia uniforme jogadór no bola husi Ministériu Edukasaun.
Purtantu klubu 10 ne’ebé kompete iha eventu ne’e, vensedór ka kampeaun sei hetan taxa rotativa, taxa permanenti ida ho osan $500, segundu lugár taxa permanente ida ho osan $300, terseiru lugár sei hetan taxa permanente ida ho osan $200.
Notísia relevante: CDTL-AMB diskute preparasaun atu partisipa Fronteira Cup iha Atambua
Jornalista: Sérgio da Cruz
Editór: Evaristo Soares Martins
