iklan

COVALIMA, HEADLINE

Ministériu Edukasaun distribui mobiliáriu, komputadór no motorizada ba Covalima

Ministériu Edukasaun distribui mobiliáriu, komputadór no motorizada ba Covalima

Komputadór no mákina impresaun. Foto/Celestina Teles.

COVALIMA, 14 Maiu 2024 (TATOLI) – Ministériu Edukasaun (ME) distribui ona komputadór, mákina impresaun, motorizada no mobiliáriu eskolár ba Servisu Edukasaun Covalima.

Xefe Departamentu Dezenvolvimentu Parke Eskolár, Manuel França, informa distribuisaun materiál sira ne’e relasiona ho proposta Edukasaun Covalima ne’ebé submete ba ME, tanba eskola públika sira presiza mobiliáriu eskolár.

“Ita simu mobiliáriu husi Ministériu Edukasaun iha semana kotuk. Daudaun ne’e seidauk halo distribuisaun”, Manuel França dehan iha Santa Rosa, ohin.

Nia adianta katak ME disponibiliza motorizada 20, komputadór 20, mákina impresaun 20, meza 106 no kadeira 130.

Kona-ba motorizada ne’ebé seidauk distribui, Manuel França esplika diretór eskola sira presiza entrega uluk dokumentu motorizada tuan atu halo leilaun, hafoin bele entrega foun.

“Ha’u  pasa ona informasaun liuhusi WhatsApp ba diretór EBC hamutuk 20 atu entrega dokumentu motorizada anteriór, maibé sira aprezenta razaun katak motorizada ne’ebé uluk simu, daudaun balun para de’it iha uma, balun rai iha bengkel no sira laiha transporte”, nia realsa.

Relasiona ho mobiliáriu eskolár, tuir planu, sei distribui ba eskola bázika filiál (EBF) Tobur iha postu Suai no EBF Belulik Kraik iha Fatumea.

Diretór Eskola Bázika Sentrál 11 Marsu, Evaristo do Carmo, dehan estudante iha EBC enafatin uza kadeira masa hodi hala’o prosesu ensinu-aprendizajen hodi hein Ministériu Edukasaun distribui mobiliáriu eskolár ba sira.

“Ha’u submete bebeik proposta kona-ba eskola laiha kadeira no meza, maibé to’o ohin loron seidauk iha rezultadu. Tanba ne’e, hein de’it ona bainhira mak atu to’o mai, nune’e estudante sira bele tuur ho seguru hodi tuir prosesu aprendizajen”, nia espera.

Tuir dadus, EBC iha Covalima hamutuk 23, husi númeru ne’e eskola publika 20 ho nia filiál 95  no Katólika tolu ho nia filiál rua.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!