OÉ-CUSSE, 21 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Laboto, fó-sai katak, iha iha tempu badak sei dezloka Oé-Cusse oan na’in-50 iha aeroportu Rota do Sândalo atu tuir formasaun hodi hasa’e koñesimentu kona-bá aeroportuáriu nian iha nasaun viziñu Repúblika Indonézia.
Notísia relevante: Autoridade RAEOA dezloka funsionáriu aeroportu 25 tuir formasaun iha Jakarta
Prezidente Autoridade RAEOA, Rogério Tiago Lobato, hateten, objetivu husi formasaun ne’e atu prepara Oé-Cusse oan sira, ba futuru bele jere rasik aeroportu internasionál Rota do Sândalo Oé-Cusse.
“Ha’u reprezenta Autoridade RAEOA, hakarak hato’o informasaun ba povu Atoni-oan tomak katak, Autoridade planeadu no sei haruka Atoni-oan purvolta ema na’in-50 hodi ba tuir formasaun aeroportuaria nia iha Indonézia iha tinan ida-ne’e, atu nune’e Atoni-oan mak sei serbí duni no dezenvolve duni nia rain rasik iha futuru,” Rogério Lobato, ko’alia iha Oé-Cusse.
Autoridade ne’e agradese ba Governu Sentrál liuhusi Aeroportu no Navegasaun Aérea Timor-Leste, Empreza Públika (ANATL.EP), tanba bele apoia inisiativa ne’e, atubele kapasita Oé-Cusse sira.
“Agradese ba Governu liuhusi Ministériu Transporte Komunikasaun, liu-liu ANATL,E.P. bele apoiu no koopera ho RAEOA planu ba formasaun ida-ne’e, ho esperansa boot, iha futuru mai bolseiru sira bele hala’o sira-nia funsaun no kontribui ba dezenvolvimentu rai ida ne’e,” nia orgullu.
Notísia relevante: Formasaun iha Jakarta, nu’udar preparasaun ba futuru sertifikasaun aeroportu Rota do Sândalo
Rekorda fali katak, iha 2022, Autoridade Autoridade sesante dezloka funsionáriu aeroportu Rota do Sândalo na’in-25 tuir formasaun durante fulan tolu iha Sentru Formasaun no Kapasitasaun Curu (BP3) iha Tanggeran, Jakarta, Indonézia.
Formasaun ne’e kona-bá, seguransa, bombeiru no operasionál, no daudaun ne’e totál funsionáriu sira hala’o serbisu iha aeroportu Rota do Sândalo hamutuk na’in 50-resin.
Notísia relevante: RAEOA-BP3 Curug selebra akordu kooperasaun iha área téknika aviasaun akadémika
Jornalista: Abílio Elo Nini
Editór: Evaristo Soares Martins
