Top

Prezidente WWR Ázia hakarak estabelese federasaun Rugby iha Timor-Leste

Bola Rugby.Imajen/Espesial.

DILI, 22 maiu 2022 (TATOLI) – Prezidente World Wheelchair Rugby (WWR) Ázia, Qais Al-Dhalai,  ho ekipa, kuarta ne’e,  hasoru malu ho Prezidente Repúblika, José Ramos Horta,  iha Palásiu Prezidensiál Bairru-Pite Dili hodi ko’alia atu estabelese federasaun Rugby iha Timor-Leste.

“Hasoru malu ho Prezidente Repúblika ko’alia kona-bá oinsá atu estabelese federasaun Rugby iha Timor-Leste no Prezidente suporta loos inisiativa ami nian ne’e, tanba atu hakle’an talentu joven sira nian iha mundu desportiva,” Prezidente WWR ne’e katak ba jornalista sira hafoin ramata enkontru.

Nia dehan, iha loron 23 Maiu ne’e hasoru malu ho Ministru Juventude, Desportu Arte no Kultura (MJDAK), oinsá atu haree ba oin estabelese federasaun ne’e iha Timor-Leste.

“Rugby hanesan atividade desportiva ida ne’ebé la’os foun, iha nasaun barak iha Ázia konese atividade desportiva ne’e, hanesan Tailándia, Filipina, Indonézia, Singapura no nasaun seluk tan, entaun aban ami sei hasoru tan Ministru Juventude Desportu atu ko’alia no fó autorizasaun ami kompleta prosesu hotu atu estabelese federasaun Rugby iha Timor-Leste ne’ebé ema Timor mak sei lidera,” nia afirma.

Bainhira Estadu Timor-Leste autoriza federasaun Rugby iha Timor-Leste mak sei realiza selebrasaun memorandu atu haforsa liutan federassun nia ezistensia.

“Bainhira Estadu autoriza ita estabelese federasaun ne’e mak iha asina memorandu ida entre ami ho Governu. Ami hatene iha Timor-Leste ema barak seidauk konese kona-ba ativiade ne’e, maibé iha ema balu hatene ona kona-ba Rugby, sira mak sei ka’er federasaun ne’e no ami prontu suporta formasaun ba atleta sira, nune’e iha eventu internasionál ruma Timor-Leste mós ba partisipa. Ami hatene ema Timor mak trenu bele hatene halimar Rugby,”  katak.

Ho inisiativa husi federasaun internasionál ne’e, Xefe Estadu apresia tanba bele foti ona inisiativa mai Timor-Leste atu estabelese atividade desportu ho modelu foun ba joven Timor-Leste bele aprende.

Jogu Rugby nia orijinalidade husi nasaun Inglaterra harii husi William Webb Ellis iha tinan 1871, iha ne’ebé nia jogu hanesan ho futeból Amerika nian, maibé nia regra halimar hada’u malu bola husi liman ba liman so’e ba iha markasaun iha kampu laran, nune’e bele hetan pontu.

Rugby sai konesidu ba mundu hotu hatene iha tinan 1895 bainhira hamosu liga. Regulamentu jogu Rugby nian jogadór hamutuk 15 mak joga iha kampu laran númeru kamijola hahú 1-8.

Jornalista: Hortencio Sanchez

Editor: Florencio Miranda Ximenes

Publisidade

Leave a Reply

Latest Post

error: Content is protected !!