EKONOMIA, HEADLINE

TradeInvest selebra akordu tékniku ho ILO dezenvolve negósiu nuu

TradeInvest selebra akordu tékniku ho ILO dezenvolve negósiu nuu

Country Diretór ILO ba Indonézia no Timor-Leste, Simrin Singh, asina akordu koperasaun tau forsa hamotuk dezenvolve negosiu nu'u iha Timor-Leste ho Diretór Promosaun Exportasaun Tradeinvest, Decio Ribeiro Sarmento, iha Salaun Novu Turismu, kinta (23/05). Imajen Tatoli/Francisco Sony

DILI, 23 maiu 2024 (TATOLI) – Ajénsia TradeInvest Timor-Leste asina akordu kooperasaun tékniku ho Organizasaun Internasionál Traballu (ILO, sigla inglés) atu dezenvolve negósiu nuu iha Timor-Leste.

“Ajénsia Tradelnvest Timor-Leste ohin asina akordu ho tékniku ho Organizasaun Internasionál Traballu ho objetivu atu hamutuk hodi promove ita-nia setór privadu sira ne’ebé mak halo negósiu ba produtu nuu iha ita-nia rain”, Diretór Promosaun Esportasaun TradeInvest Timor-Leste Decio Ribeiro Sarmento informa ba jornalista sira hafoin asina akordu iha Novo Turismo, ohin.

Country Diretór ILO ba Indonézia no Timor-Leste, Simrin Singh, asina akordu koperasaun tau forsa hamotuk dezenvolve negosiu nu’u iha Timor-Leste ho Diretór Promosaun Exportasaun Tradeinvest, Decio Ribeiro Sarmento, iha Salaun Novu Turismu, kinta (23/05). Imajen Tatoli/Francisco Sony

Nia dehan, TradeInvest nia resposabilidade mak atu buka dalan ka fasilita produtór ka setór privadu sira ne’ebé mak halo produsaun nuu ho ligasaun ba merkadu.

“Resposabilddae hosi ILO nian mak atu fornese formasaun ka treinamentu tékniku ba ita-nia  produtór sira atu sira bele iha koñesimentu di’ak liután hodi bele hasa’e produsaun no mós hodi bele hadia di’ak liután kualidade ba ita-nia produtu nuu atu ita bele esporta ita-nia  produtu ne’e ba merkadu internasionál”, nia esplika.

Nia afirma, molok atu asina akordu mak TradeInvest hamutuk ho ILO ba munisípiu sira ne’ebé mak ema kuda nuu barak iha parte leste ne’eba hanesan Baucau, Viqueque no Lautem.

“Iha momentu ne’eba, ami hasoru Prezidente Autoridade Munisípiu sira atu bele husu apoiu no servisu hamutuk atu bele fahe informasaun to’o ba ita-nia produtór sira, tanba ita-nia agrikultura sira kuda barak iha parte leste, entaun projetu ida-ne’e mós servisu hamutuk ho Ministériu Agrikultura Peska Pekuaria no Floresta, tanba sira mak na’in ba setór ne’e, atu bele kontinua fó apoiu ba ita-nia produtor sira hodi hasa’e produsaun nuu, tanba nuu iha valór  barak tebes atu industrializa ka transforma nuu ba produtu sira hanesan vibra de copo, mina nuu virjen sira”, nia relata.

Iha fatin hanesan, Diretór Nasionál ILO ba Indonézia no Timor-Leste, Simrin Singh, dehan ILO iha kompetensia agroflorestál bele suporta dezenvolvimentu negósiu cadeia de valor nu’u iha Timor-Leste.

“ILO kontinua suporta Governu Timor-Leste liuhosi fornese formasaun hodi hasae abilidade ba juventude, feto no família sira iha área rurál atu sira bele hetan empoderamentu ekonómiku no hetan abilidade ne’ebé presiza atu hamutuk, kolabora ho setór privadu atu espanda plantasaun nuu no negósiu iha eskala industriál, ne’ebé sei kontribui ba ekonomia nasionál no oportunidade iha negósiu no empregu”, Simrin Singh afirma.

Embaixadór Uniaun Europeia iha Timor-Leste, Marc Fiedrich, hateten projetu abilidade agroflorestál hetan fundu husi União Europeia, hodi kontribui ba diversifikasaun ekonomia iha Timor-Leste, liuhosi identifikasaun oportunidade ba dezenvolvimentu agroflorestál foun iha cadeia de valór nuu.

“Ami espera, ho projetu ida-ne’e, atu hasa’e kapasidade juventude no feto sira iha Timor-Leste no fó abilidade empreendendorismu no dezenvolvimentu agroflorestál, atu kria sira-nia empregu rasik no dezenvolve ekonomia nasaun”, Marc Fiedrich informa.

Nuu nu’udar produtu plantasaun populár iha Timor-Leste, kuaze kuda ona iha fatin barak, liuliu iha área kostál ho produsaun estimadu tonelada 30,000 kada tinan. Kobre área totál ho etare hamutuk 12,000 ho agrikultór hamutuk 16.000.

Negósiu nuu iha potensiál boot no iha merkadu internasionál ne’ebé seidauk utilizadu hanesan Austrália no nasaun sira iha Europa hosi produtu nuu sira hanesan nuu isin, nuu kulit, nuu-koir no nuu kakun, ne’ebé seidauk esploradu, uza no prosesa iha Timor-Leste.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!