EKONOMIA, BOBONARO, HEADLINE, MUNISÍPIU

MAPPF kolleta hare ektare 100 iha Maliana

MAPPF kolleta hare ektare 100 iha Maliana

Ministru Agrikultura Pekuária, Peska no Floresta, Marcos da Cruz, hamutuk ho Autoridade Munísipiu Bobonaro no Kámara Komérsiu Indústria Munisipál, kolleta hare iha área Ramaskora, postu administrativu Maliana. Imajen espesiál.

BOBONARO, 24 maiu 2024 (TATOLI)-Ministru Agrikultura, Pekuária, Peska Floresta (MAPPF), Marcos da Cruz, hamutuk ho autoridade Bobonaro, sesta ne’e halo kolleta ikus hare époka dahuluk 2023-2024 iha área Poetali-Ramaskora, suku Raifun, postu administrativu Maliana, neʼebé natar-na’in sira kuda liuhusi programa prátika agrikultura di’ak ho métodu kuda hare liña.

Notisia eelevante: CCI-TL koopera ho KADIN Indonézia dezenvolve setór agrikultura

“Ohin mai kolleta hare iha irrigasaun Maliana ektare 100, loloos ne’e mai kolleta iha loron 14 liubá, maibé ohin ita mai haree katak 70% husi área Maliana I ne’e agrikultór sira ko’a hotu ona,” Ministru Marcos informa ba Jornalista sira hafoin kolleta.

Nia sente kontenti no apresia ho vontade natar na’in-sira ne’ebé pertense ba iirgasaun Maliana I tanba hatudu rezultadu produsaun di’ak ho nia kuantidade kada ektarese atinje toneleda lima.

“Ida-ne’e ezemplu ba sira seluk, iha-ne’e hatudu rezultadu di’ak, ema haree depois bele implementa hotu nune’e ita haree produsaun hare iha rai-laran,” nia katak.

Nia apela ba natar na’in iha munísipiu Bobonaro no munísipiu sira seluk atu labele dúvida ho merkadu, tanba governu liuhosi Sentru Lojístika Nasionál (CLN, sigla portugés) tau orsamentu inklui servisu hamutuk ho setór privadu balu sosa hare kulit.

Biban ne’e Ministru Marcos mos entrega ekipamentu Power Treasher hodi fasilita natar na’in sira baku hare ho efetivu.

Diretór Agrikultura Munisípiu Bobonaro, Longuinhos Joao, katak dadaun ne’e extensionista suku sira rekolla hela dadus iha terrenu atu idetifika rezultadu produsaun hare époka dahuluk tinan ne’e kada ektare atinje tonelda hira.

Daudaun ne’e natar na’in sira iha parte Cailaco-Marco, Halecou, Nunura no Atabae tama ona ba époka daruak.

Natar Na’in Maliana, Casemiro Lopez, agradese ba governu tanba liuhosi programa ne’e hatudu rezultadu produsaun hare di’ak.

“Ida-ne’e liu husi ita hotu-hotu nia esforsu, liuliu tékniku sira ha’u nafatin husu apoia ba ministériu atu apoia nafatin liu tratór ki’ik, ami presiza atubele hasa’e produsaun,” nia fó hanoin.

Enkuantu totál natar ne’ebé iha postu administrativu Maliana hamutuk ektare 1.050, husi númeru ne’e ektare 200 mak kuda hare liuhusi programa Prátika Agrikultura Di’ak, ne’ebé mai husi suku Ritabou, Raifun, Lahomea, Odomau, Holsa no Tapo-Memo.

Notísia relevante: MAPPF kolleta Hare ektare lima iha Maliana

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!