Mercy Corps no KOICA selebra susesu husi programa PREPARADU
DILI, 28 maiu 2024 (TATOLI) – Mercy Corps marka programa PREPARADU nia rohan Inisiativa tinan tolu ne’ebé finansia husi Ajénsia Kooperasaun Internasionál Koreia (KOICA) ninia objetivu atu hatan ba lixu plástiku ne’ebé aumenta bebeik ho nia jestaun ne’ebé la apropriadu iha Timor-Leste.
“Problema fo’er ne’e ameasa de’it Timor-Leste nia furak fíziku, maibé mós aumenta risku ba inundasaun iha área urbanu, ameasa ema sira ne’ebé envolve iha rai fo’er ne’ebé la di’ak, estraga poténsia ekonómika, indústria turizmu nian, no kontribui ba risku mudansa klimátika ne’ebé agora dadaun estadu seidauk prepara ho diak,” Diretór Nasionál Mercy Corps, Jules Keane, hateten ba jornalista sira iha Hotel Timor, ohin.
Diretór nasionál ne’e dehan, programa ne’e implementa iha koordenasaun besik ho Ministériu Turizmu no Ambiente, Ministériu Edukasaun, Ministériu Transporte no Komunikasaun, Sekretáriu Estadu Protesaun Sívil no Autoridade Munisípiu Dili.
“Rezultadu prinsipál husi programa ida-ne’e mak atu habelar resiklajen plástiku iha eskala komersiál dahuluk iha Timor-Leste liuhusi apoiu husi programa PREPARADU no projetu pilotu haat ne’ebé hatudu utilizasaun bloku sira ne’ebé hetan resiklasaun plástiku ne’ebé hetan apoiu no autorizasaun husi Governu,” nia esplika.
Ezekutiva ne’e hateten, to’o ohin loron instaladu ona iha instituisaun parseiru hamutuk 70, estudante na’in 200 hetan kapasidade atu sai ajente ba mudansa, hodi promove redusaun lixu plástiku no mós envolvimentu eskola sira 20 iha Timor-Leste.
“Programa ida-ne’e mós harii Sistema Avizu Early Inundasaun (EWS) iha kolaborasaun ho Diresaun Meteorolojia no Jeofízika, hodi kompleta planu kontinjénsia inundasaun 90 ba Munisípiu Dili. Husi suku 15 iha Dili envolve iha atividade DRR (hamenus risku dezastre naturál) no forma ona Komisaun Jestaun Dezastre Suku (SDMC),” nia esplika.
Iha fatin hanesan, Diretór Nasionál ba Mudansa Klimátika husi Ministériu Turizmu no Ambiente, João Carlos, apresia serbisu maka’as husi Mercy Corps no KOICA hodi implementa programa PREPARADU iha kolaborasaun ho Governu.
“Programa hirak-ne’e hotu util tebes atu proteje no proteje natureza hodi konsidera katak Timor-Leste, nu’udar nasaun ki’ik ida-ne’ebé hakarak dezenvolve, mós iha risku husi mudansa klimátika, nune’e asaun hirak ne’ebé foti importante tebes atu hamenus risku impaktu husi problema klimátiku sira,” João Carlos afirma.
Entretantu, hanesan parte ida husi eventu enserramentu programa ne’e nian, merkadu ida-ne’ebé hatudu produtu sira husi empreza lokál sira.
Empreza hamutuk sanulu-resin-tolu mak envolve iha demonstrasaun produtu, aprezenta sira-nia kriasaun, no interasaun direta ho potensiál sira. Inisiativa ne’e ninia objetivu mak atu fó espozisaun no apoiu ba grupu rekiklajen lokál sira, atu rezolve dezafiu sira hanesan espozisaun limitadu, falta parseiru, teknolojia no fatin fa’an.
Jornalista : Felicidade Ximenes
Editór : Rafael Ximenes de A. Belo
